QR UǴA akademıgi Baýyrjan Jumahanuly Omarov alpys jasqa toldy, dep habarlaıdy "Adyrna" saıty. Bul týraly áriptesi Serikzat Dúısenǵazy óziniń Facebook paraqshasynda jazyp, quttyqtaý tilegin bildirdi.
"Búgin bizdiń Teleradıo jáne qoǵammen baılanys kafedrasynyń professory, QR UǴA akademıgi Baýyrjan Jumahanuly Omarov alpys degen asqaraly jastyń asqaq shyńyn baǵyndyryp otyr. Asqaq shyń dep otyrǵanym beker emes. «Seksen jasap segiz sóz qaldyrmaǵan» dep muzbalaq Muqaǵalı aıtqandaı, alpys degenge árkim kelýi múmkin. Al bizdiń Baýyrjan aǵamyzdyń jóni bólek. Bul jasqa nardyń belin qaıystyratyn tolaǵaı tabyspen jetti. Alaqandaı Qaratereńnen shyǵyp, qalyń qazaqtyń Baýyrjanyna aınaldy. Jýrnalıstıkada qalamynyń ushqyrlyǵymen oqyrmandy tamsandyrsa, ǵylymda ustazy Zeınolla Qabdolovtyń izin basyp akademık atandy. Memlekettik qyzmette de ulttyq damýymyzǵa mańyzdy mekemelerdi laıyqty basqardy. Onyń bárin tizetin bolsam birneshe tom kitap bolary anyq.Jalpy, Baýyrjan aǵany tanyǵanyma otyz jyldyń júzi bolypty. Alǵash Ál-Farabı atyndaǵy QazUÝ-da ol aspırant men stýdent bolyp júrgen kezde kezdesip áńgimelestik. Meniń aıtysqa shyǵyp júrgenimdi estigen aǵam óziniń stýdent kezinde aıtysqa qatysqanyn aıtyp, sol aıtystyń qyzyq tustaryn toqtamaı jatqa soqqany esimde qalypty. Baýkeńniń sózge tapqyrlyq sheberligine, ıýmorǵa júıriktigine qaıran qalyp qaıtqanym bar-tuǵyn. Keıin aǵamnyń izin basyp men de «Zar zaman ádebıetin» zertteı bastadym. Ol kisi Murat Móńkeulynyń shyǵarmashylyǵynan kandıdattyq dıssertaııa qorǵady. Maǵan ǵylymı jetekshim, professor Tursynbek Kákishuly Dýlat Babataıulynyń shyǵarmashylyǵyn zertteýdi tapsyrdy. Bul taqyryp meni aǵama odan saıyn jaqyndatty. Kezdese qalsaq aǵamnyń kól-kósir biliminen sýsyndap qaıtamyn. Baýyrjan aǵa keıingi jastarǵa jol kórsetýden jalyqpaıtyn adam. «Aldyńda aǵań bolǵan qandaı jaqsy!» degen óleń osyndaı aǵalarǵa arnap shyqqan bolsa kerek.Baýkeńniń dostary myqty. Birge oqyǵan kýrstastary Talǵat Batyrhan, Muratbek Toqtaǵazın, dostary Amantaı Shárip, Dıhan Qamzabekuly, Qydyrbek Rysbek, Erbol Tileshov, t.b. ortasynda jáı adam júre almaıdy. Ol ortaǵa kirý úshin oqyǵan-toqyǵanyń, ǵylym men bilimge úlken daıyndyǵyń bolý kerek. Olar bas qosqanda dostyq ázilderinen bólek, áńgime ǵylymı semınarǵa aınalyp ketedi. Soǵan ilese alǵan adam ol ortaǵa sińedi.Baýyrjan aǵa uly ustazdary Z. Qabdolov, S. Qırabaev, S. Qasqabasovtar syndy sońynda úlken mektep qalyptastyrǵan ǵalym. Shákirtteri Muhıt Salqynbaı, Aqjigit Álibek, Tóreáli Qydyr, t.b. qazirgi ádebıettaný, folklortaný, shyǵystaný salasyna olja salyp júrgen azamattar. Jýrnalıstka salasynda da birneshe býyn shákirtteri dıssertaııalyq jumystaryn qorǵap, ustazdarynyń abyroıyn asyryp júr.Baýyrjan aǵanyń balalary da «áke kórip, oq jonǵan» myqtylar. Baqytjan Baýyrjanuly Túrkııanyń ataqty TRT telearnasynda tilshi, telejúrgizýshi boldy. Elge oralyp Qyzylorda oblysy ákimdiginiń baspasóz salasyn basqardy. Dáýren Baýyrjanuly da «Qazaqstan» TRK Qytaı halyq Respýblıkasyndaǵy tilshisi boldy. Elge oralǵan soń «Almaty» telearnasynyń dırektorynyń orynbasary bolyp taǵaıyndaldy. "Jýrnalıstıka" salasy boıynsha QR «Daryn» Memlekettik syılyǵynyń laýreaty. Aǵamyzdyń úsh uly bar. Barlyǵy elge abyroıly azamattar.Qazir QR Prezıdentiniń keńesshisi degen bıik laýazymdy atqaryp júrse de Baýyrjan aǵa sol baıaǵy qarapaıym qalpynan ajyramaı, jastarǵa úlgi bolyp keledi. «Ǵylym kúni» merekesinde ómirge kelgen aǵamdy «taltúsimen» quttyqtaı otyryp, akademık Serik Qırabaev ustazynyń jetken jasynan asyp ketýine tilektespin!" dep jazdy Serikzat Maqsutuly.
"Adyrna" ulttyq portaly
