26 qańtarda Qaraǵandy oblysynyń ákimi Jeńis Qasymbek óziniń feısbýk áleýmettik paraqshasynda 2021 jyldyń qorytyndysy boıynsha óńirdegi turǵyn úı qurylysy jáne turǵyn úılerdi paıdalanýǵa berý kórsetkishi jaıynda birneshe derek keltirdi. Ákim jazǵan faktilerdiń qanshalyqty ras ekenin tekserip kóreıik.
“Qarjylandyrýdyń barlyq kózderi esebinen biz 662 myń m² turǵyn úıdi paıdalanýǵa berdik. Bul shamamen jeti myń páter”.
Úkim: Shyndyqqa jaqyn
Qaraǵandy oblysy ákimdiginiń resmı saıtynda 25 qańtar kúni Qaraǵandy oblysynyń qurylys, sáýlet jáne qala qurylysy basqarmasynyń basshysy Abzal Jaılybaev “2021 jyly «Nurly jer» memlekettik baǵdarlamasy boıynsha oblysta barlyq qarjylandyrý kózderi esebinen 662 myń sharshy metr turǵyn úı paıdalanýǵa berildi. Bul shamamen 7 myń páter”- degen derek keltiredi.
Alaıda Ulttyq statıstıka bıýrosynyń resmı málimetine sáıkes, eń keıingi derek 2021 jyldyń 21 jeltoqsanynda jarııalanǵan aqparatqa saı, turǵyn úıdi paıdalanýǵa berý kórsetkishi 2021 jylǵy qańtar-qarashada jalpy alańy 508,2 myń sharshy metrdi qurasa, barlyq menshik nysanyndaǵy uıymdar 4543 páter salǵan.
Odan bólek, statıstıka bıýrosynda 2021 jyldyń 23 jeltoqsanynda jarııalanǵan aqparatqa sáıkes, ár aı saıyn qansha myń sharshy metr turǵyn úı paıdalanýǵa berilgeni jaıly derek anyq-qanyq keltirilgen. M.: qańtar (57 859), aqpan (34 452), naýryz (54 441), sáýir (13 416), mamyr (34 057), maýsym (19 789), shilde (57 486), tamyz (36 470), qyrkúıek (88 615), qazan (71 270), qarasha (40 380), jeltoqsan aıy (-). Barlyǵyn qosqanda: 508 235 m².
Oblys ákimi keltirip otyrǵan 662 myń m² bolǵanda, jeltoqsan aıy boıynsha - (153 765) bolýy kerek edi. Statıstıka bıýrosynyń resmı aqparatynda sońǵy jeltoqsan aıy boıynsha bul kórsetkish kórsetilmegen.
Ákim jazbasyna júrgizilgen faktchek qorytyndysy boıynsha, Ulttyq statıstıka bıýrosynda Turǵyn úıdi paıdalanýǵa berý týraly 2021 jyldyń tolyq kórsetkishi áli jarııalanbaǵandyqtan, ýaqyt aralyǵyndaǵy kórsetkish ózgerisin salystyrý metodologııa turǵysynan durys emes.
Zarına ÁShIRBEK,
"Adyrna" ulttyq portaly
