Shymkent qalasy ákiminiń orynbasary Erǵalı Bilisbekov turǵyndardy jeke máseleleri boıynsha qabyldaýynan keıin «Turan-2» shaǵyn aýdanyndaǵy áleýmettik osal toptaǵy azamattarǵa qarastyrylǵan turǵyn úılerdi aralady. Qabyldaýda bolǵan Saltanat Esbosynovanyń ótinishi boıynsha jańa baspanalardyń múmkindigi shekteýli azamattarǵa yńǵaılylyǵyn tekserdi.
Qala turǵyny 2012 jyly 1-2 top sanaty boıynsha turǵyn úı kezegine tirkelgen. Búginde jańadan boı kótergen turǵyn úıdiń birinshi qabatynan 1 bólmeli pátermen qamtamasyz etilip otyr. Alaıda, jýynatyn bólme esiginiń tarlyǵyna narazy. Aıtýynsha, múgedekter arbasynyń kólemi eskerilmegen. Qala ákiminiń orynbasary bul kemshilik boıynsha qalalyq qurylys basqarmasy men merdiger kompanııa ókilderine qatań eskertý jasap, páterdi osy azamattardyń yńǵaılyǵyna saı túzeýge ýaqyt berdi.
-Bolashaqta eshkimniń ómirine nemese densaýlyǵyna kepil joq. Sol sebepti úıdi ózderińe arnaǵandaı salý qajet. Taıaý ýaqyt ishinde bul kemshilikti joıyp, yńǵaıly pátermen qamtamasyz etýimiz kerek. Túptep kelgende tapsyrylǵan nysannyń kepildik merzimi de ótpegen, - dedi Erǵalı Bilisbekov.
Sondaı-aq, qala basshysynyń orynbasary turǵyn úılerdegi pandýstar men aýlalardyń abattandyrylýyn baqylady. Aıtýynsha, jańa baspanalardyń jobalaý qujatynda múmkindigi shekteýli azamattardyń talaby qatań eskerilip, páterler tek tómengi qabattarynan úlestirilýi tıis. Aldaǵy ýaqytta «Turan-2» shaǵyn aýdanynan áleýmettik osal toptaǵy azamattarǵa arendalyq úımen qamtý maqsatynda taǵy 9 úı qala menshigine ótkeli otyr.
Shymkent qalasy ákimdiginiń baspasóz qyzmeti
