Memleket basshysy kórnekti qalamger, Qazaqstannyń Eńbek Eri, Halyq jazýshysy, Uly Otan soǵysynyń ardageri Ábdijámil Kárimuly Nurpeıisovtiń dúnıeden ótýine baılanysty otbasyna kóńil aıtý jedelhatyn joldady. Bul týraly Prezıdenttiń baspasóz hatshysy Berik Ýálı Facebook-tegi paraqshasynda jazdy, dep habarlaıdy "Adyrna" ulttyq portaly.
Qasym-Jomart Toqaev jedelhatta Ábdijámil Kárimulynyń surapyl soǵysty bastan keshkenin, elge oralǵan soń qazaq ádebıetin órkendetýge súbeli úles qosqanyn atap ótti.
– Uzaq jylǵy shyǵarmashylyq qyzmeti jemisti boldy. «Qan men ter» trılogııasy, «Sońǵy paryz» dılogııasy sııaqty týyndylary synshylar men oqyrmandar tarapynan joǵary baǵasyn aldy. Zaman júgin kótergen romandary álemniń kóptegen tilderine aýdaryldy. Ábdijámil Kárimulynyń jańa belesti baǵyndyrǵan qazaq ádebıetin shetelge tanytýǵa sińirgen eńbegi orasan zor. Ómir boıy qolynan qalamy túsken joq. Qazaq eliniń rýhanı-mádenı salasyn damytý jolynda ólsheýsiz qyzmet atqardy. Ónegeli ǵumyr keship, sońyna ádebı mol mura qaldyrǵan Ábdijámil Kárimulynyń jarqyn beınesi umytylmaıdy. Halqymyz esimin árdaıym ardaq tutady. Marqumnyń ımany salamat, jany jánnatta bolsyn, – delingen Prezıdenttiń jedelhatynda.
"Adyrna" ulttyq portaly
