Zańgerlerdiń aıtýynsha, jumystan ketken UQK qyzmetkerleri qylmystyq jaýapkershilikke tartylýy múmkin. Advokattar olarǵa zań boıynsha jaýap berýge bolatynyn da aıtty, dep habarlaıdy "Adyrna" ulttyq portaly "Caravan.kz"-ke silteme jasap.
2022 jyldyń 11 qańtarynda Prezıdent Qasym-Jomart Toqaev parlamentte sóılegen sózinde: "Barlyq adam óz mindetine adaldyq tanyta bermeıdi. Birqatar qalalarda Ulttyq qaýipsizdik komıtetiniń qurylymdyq bólimsheleriniń basshylary jetkilikti áskerı arsenalǵa qaramastan, qyzmettik ǵımarattan urysqa qatyspaı, qarý-jaraq pen qupııa qujattardy sol jerde qaldyryp ketken", - degen bolatyn.
QazTAG agenttigine bergen suhbatynda zańger Aıman Omarova: "Qańtar oqıǵasy kezinde Almaty qalalyq Ulttyq qaýipsizdik komıteti (UQK) departamentiniń ǵımaratynan shyǵyp ketken qyzmetkerler jaýapqa tartylýy kerek", - dedi.
Sondaı-aq, advokat Aıman Omarova tergeýdi birneshe qyzmet túrlerimen birge muqııat júrgizý kerek dep sanaıdy.
"Men Almaty qalasy boıynsha QR UQK jáne ǵımarattan shyǵyp, qarýdy is júzinde tapsyrǵan departament qyzmetkerlerin qylmystyq jaýapkershilikke tartýdy jáne osy sanattaǵy ister boıynsha tergeýdi sybaılas jemqorlyqqa qarsy qyzmet, tergeý-jedel toby men Ishki ister mınıstrligi júrgizsin dep talap etemin. Oǵan prokýratýra da qatyspaýy kerek", - dedi Aıman Omarova.
Onyń sot talqylaýy qajet degen pikirin Almaty qalalyq advokattar alqasyndaǵy áriptesteri de qoldap otyr. Zańger Djohar Ótebekov bul týraly:
"Men bul jerde "salaqtyq" babynyń belgilerin kórip turmyn – bul QR Qylmystyq kodeksiniń 371-babynda kórsetilgen qyzmettik mindetterin tıisinshe oryndamaý. Jumystan ketken UQK qyzmetkerlerine qatysty, bul abaısyzdyq pa, álde qasaqana pogromshylarǵa qoldaý kórsetý úshin jasady ma, solardy osylaı ataıyq. Bul jaǵdaıda Qazaqstan Respýblıkasy Qylmystyq kodeksiniń basqa baptary qoldanylýy múmkin: 370-den bastap. - "Qyzmettegi áreketsizdik" 361 - "Laýazymdy ókilettikterdi teris paıdalaný" nemese 362 - "Laýazymdy ókilettikterdi asyra paıdalaný". Máselen, UQK-niń ózi habarlaǵandaı, Kárim Másimov pen onyń keıbir tikeleı qaramaǵyndaǵylarǵa qyzmet babyn asyra paıdalaný baby boıynsha aıyp taǵylýda (Qazaqstan Respýblıkasynyń Qylmystyq kodeksiniń 362 baby). Keıbir bólimshelerdegi bandıtterdiń qarý-jaraq alýy aýyr zardap bolyp tabylady, biraq munyń barlyǵyn, árıne, tergeý anyqtaıtyn bolady. Árıne, kináliler zań aıasynda jazasyn alady dep oılaımyn", — dedi ol.
"Adyrna" ulttyq portaly
