Jelide nemeresin oınatý úshin shapan kıip, kózin oınaqtatyp, dombyramen rýhty jyr aıtqan atanyń vıdeosy tarap jatyr. Kadrlardaǵy er adam akter, teatr rejısseri Beıbit Qusanbaev bolyp shyqty dep habarlaıdy "Adyrna" ulttyq portaly "tengrinews.kz"-ke silteme jasap.
Jelidegi vıdeolardan atasy nemeserine uly Abaıdyń "Sabyrsyz, arsyz, erinshek" óleńi men "Mahambet jyryn" aıtyp bergenin kórýge bolady. Al bala ony tyńdap máz-meıram, taǵy aıtyp berýin de suraıdy.
Jeli qoldanýshylary da atasynyń bul áreketine tánti bolyp, jyly sóz jazyp jatyr. "Keremet ata! Osyndaı atalarymymyz aman bolsyn, nemeresin oınatyp, osydan asqan baqyt bar ma?", "Atamyz ónerli eken, Allanyń nury jaýsyn! Bolashaqta aıtysker aqyn ósip kele jatyr", "Atasy myqty eken pah", "Sýper ata boldy ǵoı", - deıdi olar.
Nemeresine rýhty jyr aıtyp júrgen er adam - ShQO Tarbaǵataı aýdany Aqsýat aýyly Mádenıet úıi "Halyq" teatrynyń rejısseri, Aqsýat Mádenıet úıiniń janynan qurylǵan "Tamshy" balalar teatrynyń jetekshisi Beıbit Qusanbaev bolyp shyqty.
Beıbit Qusanbaev - qazaqstandyq akter, teatr rejısseri. ShQO, Óskemen qalasy Jambyl atyndaǵy drama teatrynyń, elordadaǵy Jastar teatrynda akteri bolǵan. Ár jyldary Shabyt óner akademııasy men Temirbek Júrgenov atyndaǵy Qazaq ulttyq óner akademııasynyń oqytýshysy da bolǵan.
"Adyrna" ulttyq portaly.
