Qazaqstandyq saıasattanýshy Danııar Áshimbaev Elbasy Nursultan Nazarbaev pen memleket basshysy Qasym-Jomart Toqaevtyń arasynda qaqtyǵys boldy degen pikirdi joqqa shyǵardy. Aıtýynsha, elimizde 2024 jyly ótetin saılaýda Toqaevtyń jeńiske jetkenin qalamaıtyndar bar. Onyń saldary elimizde bolǵan qaqtyǵystarǵa alyp kelgen bolýy múmkin. Bul týraly Áshimbaev ia-centr.ru basylymyna bergen suhbatynda aıtty, dep habarlaıdy "Adyrna" ulttyq portaly stan.kz-ke silteme jasap.
- Kópshilik Toqaevtyń “tranzıtti prezıdent” ekenine senimdi boldy. Biraq Nur Otan partııasy tóraǵalyǵyn berýi muny teriske shyǵardy. Sebebi bul post onyń májiliske de, úkimetke de bıligi júretinin kórsetedi. Eń bastysy, Toqaevtyń 2024 jylǵy saılaýǵa túsetinin bildiredi, – dedi saıasattanýshy.
Áshimbaevtyń pikirinshe, elimizde alda bolatyn saılaýda Toqaevtyń jeńiske jetkenin qalamaıtyn adamdar bolǵan jáne áli de bar.
- Nazarbaevtyń ol nusqany qarastyrmaıtyny jáne sheshimin ózgertpeıtini túsinikti bolǵandyqtan, ol bizdiń basymyzdan ótken qarsylyqtar tolqynyn týdyrǵan bolýy múmkin. Sondyqtan elıtalar arasynda qaqtyǵys boldy, biraq Nazarbaev pen Toqaevtyń arasynda emes, – dep túsindirdi saıasattanýshy.
Mamannyń pikirinshe, Nazarbaevtyń týystarynan bólek, óziniń saıasattaǵy bolashaǵyn oılaǵan ózge de tulǵalar bolǵan. Mysaly – UQK-niń burynǵy basshysy Kárim Másimov. Qazirgi ýaqytta ol memlekettik satqyndyq pen tóńkeris jasaýǵa tyrysty dep kúdiktelýde.
Saıasattanýshy Toqaevtyń bandıtterdi jeńgenin atap ótti. Alaıda keıbireýler muny Nazarbaevty jeńdi dep kórsetkisi keledi, deıdi ol.
“Biraq bul Nazarbaevtyń da jeńisi. Sebebi onyń izbasary men baǵyty ornynda qaldy. Al izbasary memleketti alǵa jeteleı alatyn myqty kóshbasshy retinde kórsetti. Nazarbaevtyń qalaýy da sol edi. Sondyqtan bul Nazarbaevtyń da jeńisi”, – dedi saıasattanýshy.
"Adyrna" ulttyq portaly
