Jýrnalıstke qol jumsap, kásibı qyzmetine kedergi keltirdi dep aıyptalǵan eks-depýtat Bekbolat Tileýhan jábirlenýshi Aınur Koskınadan keshirim surady, dep habarlady ”Adyrna” ulttyq portaly “Informbıýro» baǵdarlamasyna silteme jasap.
Sheneýnik suqbat berý kezinde tilshige qarata aıtylǵan artyq sózderin qaıtyp alyp, endi qaıtalamaıtynyn aıtty.
Nur-Sultanda eks-depýtat Bekbolat Tileýhanǵa qatysty ákimshilik sot bastaldy. Sot otyrysy barysynda qos tarap ta bolǵan jaıtty táptishtep aıtyp berdi. Sheneýnik ózine taǵylǵan aıypty moıyndamaıdy. Tipti, jábirlenýshiler jala jaýyp, ar-ojdanymdy taptaǵany úshin sotqa júginemin dedi.
Biraq kýágerlerdiń isti talqylaýǵa qatysyp otyrǵanyna baılanysty sot kelesi dúısenbige aýystyryldy. Al jábirlenýshi tarap sýdıaǵa talqylaýǵa qatysqan kýálardy kelesi proeske qatystyrmaý týraly ótinish aıtty. Sózinshe, bul kýágerlerdiń obektıvti bolýyna keri áserin tıgizedi.
