Salem social The Rocket Stories كومانداسىمەن جانە رەجيسسەر الىشەر ۋتەۆپەن بىرگە «5:32» جاڭا ۆەب-سەريالىن شىعاردى. جەلىدە سەريالدىڭ ازىرشە 3 ءبولىمى عانا جارىق كوردى. الايدا كوپتەگەن ادامنىڭ كوڭىلىنەن شىعىپ، ميلليون قارالىمدى بىردەن جينادى. سەريال 90-جىلدارداعى قاتىگەزدىكتى باياندايدى. ادامداردى قيناپ، قورلاپ ولتىرۋمەن اينالىسقان مانياكتاردىڭ ادام سەنگىسىز ارەكەتتەرى جەلىسىندە تۇسىرىلگەن. سوراقىسى، ومىردە بولعان وقيعا. سەريال اۆتورلارى ءوز كورەرمەندەرىنە كوشەدە جۇرگەندە مەيلىنشە ساق بولۋلارىن ەسكەرتتى.
ادام ەتىنەن تاعام: مانياك ءالى دە ءتىرى
5:32. 2 سەريالعا ارقاۋ بولعان ءىس – ادامدى باۋىزداپ، ەتىنەن بەلياشي جاساپ، ساتقان بەلدەمشە كيگەن مانياك. سەريال جەلىسى بويىنشا، مانياك سۇراۋى جوق، ىشىمدىككە سالىنعان ەر ادامداردى ءوز قۇزىرىنا ءتۇسىردى. كۇندەلىكتى ساتاتىن بەلياشيى ادام ەتىنەن ەدى.
ۇيىنە قايتىپ بارا جاتقان كەزىندە ءبىر ەر ادام اراق سۇراپ تيىسەدى. مانياك سول جەردە ونىڭ جۇرەك تۇسىنان بىرنەشە رەت پىشاق سۇعىپ، ءولتىرىپ تاستايدى. پوليتسيا بولىمشەسىنە بارعاندا «ءوز-ءوزىمدى قورعادىم، پىشاق مەنىكى ەمەس» دەپ اقتالادى. كەيىن شالقار ەسىمدى دەتەكتيۆ بۇل ىستە ءبىر شيكىلىك بارىن ءبىلىپ، ايەلدىڭ ۇيىنە بەت الادى. سول ساتتە، مانياك كىشكەنتاي بالانى ولتىرمەك بولعان. دەر كەزىندە كەلگەنىمەن، بالا تۇنشىعىپ ءجانتاسىلىم ەتەدى...
TikTok الەۋمەتتىك جەلىسىن قولدانۋشىلار سەريالعا ارقاۋ بولعان مانياك ءالى دە ءتىرى ەكەنىن جارىسا جازۋدا. ەندەشە، «ادىرنا» ۇلتتىق پورتالىنىڭ ءتىلشىسى كسرو-نىڭ باستى كاننيبالىنا اينالعان، ادام كەيپىندەگى حايۋان اتانعان مانياك تۋرالى باياندايدى.
نيكولاي دجۋماگاليەۆ 1952 جىلى 15 قاراشا كۇنى ۇزىناعاشتا دۇنيەگە كەلگەن. اناسى بەلارۋس، اكەسى قازاق. اڭىز بويىنشا بۇل وتباسى شىڭعىس حاننىڭ ۇرپاعى. بالا كۇنىندە دجۋماگاليەۆ مۇنى ماقتان تۇتىپ، ۇنەمى ايتىپ جۇرگەن.
بالا كەزىندە ەشقانداي ەرەكشەلىگىن كورسەتپەگەن نيكولاي قاراپايىم بالالارمەن قاتار وسكەن. اشۋلى مىنەزى دە بايقالماعان. ءبىر كەمشىلىگى قىزدارعا «ولار ەكىنشى سورتتىڭ ادامدارى» دەپ مەنسىنبەۋشىلىكپەن قاراعان.
1970 جىلى الماتىداعى تەمىرجول ۋچيليششەسىن بىتىرگەننەن كەيىن دجۋماگاليەۆ جولدامامەن گۋرەۆ قالاسىنا جۇمىسقا ورنالاسىپ، كەيىن اسكەرگە اتتانادى. اسكەردەن ورالعان سوڭ ول ماماندىعىن وزگەرتۋدى ويلاپ، قازان ۋنيۆەرسيتەتىنىڭ گەولوگيالىق بارلاۋ فاكۋلتەتىنە تۇسۋگە شەشىم قابىلدايدى. بىراق جوسپارى ورىندالماي، جاڭا ماماندىقتى يگەرە المايدى. ەمتيحاننان وتپەي قالادى.
1977 جىلى ۇزىناعاشتاعى ءورت ءسوندىرۋ بولىمشەسىنە جۇمىسقا تۇرىپ، 2 جىل تىنىش ءومىر سۇرەدى. ءوزىنىڭ ەش نارسەدەن ءلاززات المايتىنىن ءتۇسىنىپ، ادام ولتىرۋگە بەل بايلايدى.
قاتىگەزدىككە بارعان العاشقى قادامى 1979 جىلى ءوز اۋىلىندا بولادى. ءتۇن ىشىندە جالعىز كەتىپ بارا جاتقان قىزدى ايۋاندىقپەن ءولتىرىپ، قانىن ىشەدى.
تولىق جان ءتاسىلىم ەتكەن سوڭ، ونىڭ ءار دەنە مۇشەسىن باۋىزداپ، ەتىن ءبىر اي بويى تاماق ەتىپ جەگەن. كوتلەت، ءتۇشپارا جاساعان.
مانياكتى بۇل ارەكەتكە ونىڭ وككۋلتيزمگە قۇمارلىعى يتەرمەلەدى: وقىعان كىتاپتارىنىڭ بىرىندە ادام تاماعىن كەسۋ ارقىلى جاننىڭ دەنەدەن قالاي شىعاتىنىن كورۋگە بولاتىنى تۋرالى ايتىلعان. سونىمەن قاتار، دجۋماگاليەۆ كىتاپتان ادامنىڭ قانىن ىشۋمەن كورىپكەلدىك قابىلەتكە يە بولاتىنىن ءبىلدى. قانىن ءىشتى، تاماعىن كەستى. بىراق ەشقانداي ەرەكشە قاسيەتتى يەلەنبەدى. اقىرىندا، قاندىقول قانىشەرگە اينالدى.
كەزەكپەن-كەزەك ويىن سەكىلدى جالعاسقان بۇل ارەكەتى اشىلىپ، تەرگەۋ بارىسىندا ايىپتالۋشى پسيحياتريالىق ساراپتامادان ءوتتى. ساراپتاما ناتيجەسى نيكولاي دجۋماگاليەۆتىڭ شيزوفرەنيامەن اۋىراتىنىن انىقتادى. وسىلايشا مانياك تۇرمەدەن قاشىپ، 4,5 جىل پسيحياتريالىق اۋرۋحانادا جاتىپ شىعادى دەسەدى. شىندىعىندا ول اۋرۋحانادا تەك 1 جىل عانا ۋاقىت بولعان. كەيىن دارىگەرلەر ناۋقاستى ءىس جۇزىندە ساۋ دەپ ەسەپتەپ، ونى بوساتقان.
بوستاندىققا شىعىپ، ەسكى اۋەنىنە قايتا باسادى. بىردەن 3 ايەلدى ولتىرەدى. ونىڭ ءبىرى جاڭا بوسانعان ايەل. ونى 18 جەردەن پىشاقتايدى.
قاندى قولدان قازا تاپقاندار سانى 9-عا جەتتى. بۇل جولى ءبارى باسقاشا. 1980 جىلى دجۋماگاليەۆتىڭ ۇيىنە دوس-جاراندارى جينالىپ، ءۇيدىڭ ءىشى ۋ-شۋعا اينالادى. ءبىر مەزەتتە قوناقتار جاس قىز بەن نيكولايدىڭ ورتادا جوق ەكەنىن بايقاپ، جاتىن بولمەگە ەسكەرتۋسىز كىرىپ بارادى. كوز الدارىنداعى سۇمدىق كارتينانى كورىپ، بىردەن پوليتسيا شاقىرادى.
ول قىزدىڭ باسىن كەسىپ، قانىن تاباققا قۇيعان. پوليتسيا كەلگەن مەزەتتە ول قاشىپ ۇلگەرەدى. كەيىن ءۇيىن ءجىتى تەكسەرۋ كەزىندە، ولگەن ادامداردىڭ ەتى، دەنەسى جاسىرىنعان بوشكەنى تاۋىپ الادى.
دجۋماگاليەۆ كوپ ۇزاماي تانىسىنىڭ ۇيىنەن تابىلدى. جەرتولەدە 2 كۇن بويى جاسىرىنعان نيكولاي 7 ادامدى ولتىرگەنىن بىردەن مويىندادى. ءدال سول ۋاقىتتا ءوزىنىڭ جاقىن اپكەسى ءىز-ءتۇسسىز جوعالىپ كەتكەن بولاتىن. الايدا بۇل ىسكە تۇك قاتىسى جوق ەكەنىن ايتىپ الەككە ءتۇستى.
جاۋاپ الۋ كەزىندە ول ادامداردى نە ءۇشىن ولتىرگەنىن اشىق ايتىپ بەردى.
«مەن تەك جانۋار كەيپىندە بولدىم. ادامدار جانۋارعا نە ىستەيدى، مەن دە سونى ىستەدىم. ماعان ايەل ادامداردىڭ اعزاسى قىزىق بولدى. ءبىر جاعىنان ايەلدەر تابيعاتقا قارسى شىعىپ ەر ادامدارمەن تەڭەسكەنى ءۇشىن ىزالاندىم»،-دەدى نيكولاي.
8 جىل پسيحياتريالىق اۋرۋحانادا جاتىپ، كەيىن دارىگەرلەر قاراپايىم پسيحياتريالىق اۋرۋحاناعا اۋىستىرۋعا شەشىم قابىلدايدى. اۋىسىم كەزىندە، ادەتتەگىشە تاعى دا قاشىپ كەتەدى.
قاشقىن تاۋلى ايماقتاردا تىعىلىپ، ۇڭگىرلەردى پانالادى. دالادان ەمدىك شوپتەردى جيناپ، ونى ىرگەدەگى اۋىل تۇرعىندارىنا سىرىڭكە مەن تاماققا ايىرباستاپ كۇن كورەدى. ءتىپتى 2014 جىلى وعان تاعى ءبىر ستۋدەنت قىزدى ءولتىردى دەگەن ايىپ تاعىلادى. وقيعا 1990 جىلى ورىن العان. بۇل ونىڭ 10-شى قۇربانى...
قازىر نيكولاي دجۋماگاليەۆ الماتى وبلىسى اقتاس اۋىلىنداعى مامانداندىرىلعان پسيحياتريالىق اۋرۋحانادا جاتىر. ءبىر كەزدەرى ونى ءتىپتى ءولىم جازاسىنا كەسۋ تۋرالى ءوتىنىش تە تۇسكەن. الايدا زاڭ تۇرعىسىنان بۇل ءوتىنىش قۇپتالمادى.
اۋرۋحانا دارىگەرلەرىنىڭ كەيبىرى ونىڭ قالىپتى ومىرگە بەيىمدەلىپ قالعانىن، جاقىن ارادا بوستاندىققا شىعۋى دا مۇمكىن دەگەن پىكىر بىلدىرگەن. بىراق قىلمىستىق ىزدەستىرۋ باس باسقارماسىنىڭ (گۋرق) سەريالىق قىلمىستار جونىندەگى مامانى ەۆگەني ساموۆيچەۆ:
«ول ادام قالپىنداعى اڭ. ول ەشقاشان ادامنىڭ ءومىرىن سۇرمەيدى»،- دەدى.
قورىتا كەلە، 90-جىلدار قاراپايىم حالىق ەسىندە «وتە قيىن، جوقشىلىق كەزەڭ» رەتىندە قالعانى راس. وكىنىشتىسى، ادامدار تەك جوقشىلىقتا ەمەس، ناعىز قاندى-قول قىلمىسكەرلەر زامانىندا ءومىر سۇرگەن.
مۇنداي جاعداي قايبىر ۋاقىتقا،كەزەڭگە قارامايدى. ءتىپتى قازىر دە مانياكتار بار. ءبىرى جاريا بولسا، ءبىرى جاسىرىن...
5:32 سەريالى ءار اپتانىڭ بەيسەنبى كۇنىندە Aitube جەلىسىنە شىعادى. كەلەسى قىلمىس قانداي بولار ەكەن؟
ءىنجۋ ومىرزاق،
"ادىرنا ۇلتتىق پورتالى
