تاڭعى ريتۋالداردى ويلاپ تابىڭىز
تاڭەرتەڭ ءسىزدىڭ كۇندەلىكتى ەنەرگياڭىزدى تولتىراتىن، قۋانتاتىن ريتۋالدار ءتىزىمىن قۇراستىرىڭىز. جۇگىرۋ، جاياۋ سەرۋەندەۋ، كىتاپ وقۋ جانە مەديتاتسيا، تاعىسىن تاعى. باستىسى بۇل پروتسەستەر سىزگە قۋانىش پەن ەنەرگيا سىيلاۋى ماڭىزدى.
تسيفرلىق تازالىققا ءمان بەرىڭىز
ءبىز تولاسسىز اقپارات اعىنىنىڭ اراسىندا ءومىر ءسۇرىپ جاتىرمىز. ونىڭ ىشىندە كەرەگى دە، كەرەكسىزى دە بار. ونىڭ ۇستىنە الەۋمەتتىك جەلىلەر ۋاقىتتى الىپ قويادى. ءبىز اقپارات اعىنىن توقتاتا المايمىز. دەسەك تە الەۋمەتتىك جەلىگە، قانداي دا ءبىر سايتقا جۇمسايتىن ۋاقىتىمىزدىڭ ءليميتىن قاداعالاي الامىز. ول ءۇشىن قاراپايىم تەلەفون تايمەرىن نەمەسە قانداي دا ءبىر باعدارلامالاردى جۇكتەپ، پايدالانۋعا بولادى.
تازالىق، تازالىق جانە تازالىق
توگىلمەگەن قوقىس، جۋىلماعان تارەلكە، ورنىندا تۇرماعان كىتاپ-داپتەرلەر كونتسەنتراتسيانى بۇزادى. ادامدار كوپ جاعدايدا ادەمى ءبىر جەردى كورگەن كەزدە موتيۆاتسياسى ويانىپ، قانداي دا ءبىر ىسكە شابىتتانا كىرىسەدى. سول ادەمىلىكتى نەگە ۇيدە جاساماسقا؟! كۇندەلىكتى تازالىققا 10-15 مينۋت بولسەڭىز، اپتا سوڭىندا تولىققاندى تازالىققا كەتەتىن ۋاقىتىڭىزدى ازىراق جۇمساعان بولار ەدىڭىز.
وزىڭىزگە ۋاقىت ارناڭىز
اينالاڭىزدا قانشا ادام بولسا، سونشا اداممەن تىلدەسەسىز، اقپارات الماساسىز، پىكىرلەرىن بىلەسىز. دەگەنمەن، اندا-ساندا ءوز-وزىڭمەن بولعانعا نە جەتسىن؟! شىن مانىندە ادامنىڭ ءوز-وزىنە دە ايتارى بار. باستىسى ىشكى داۋىستى تىڭداي الۋ ماڭىزدى. ەگەر بۇل ناعىز ءىش پىستىرارلىق جۇمىس دەسەڭىز، قاتەلەسەسىز. سەبەبى بۇل ۋاقىتتا جاقسى اۋەن تىڭداپ، ساياباقتا سەرۋەندەۋگە، كينو كورۋگە، قانداي دا ءبىر حوببيمەن اينالىسۋعا بولادى.
بىلىمگە، دامۋعا كوڭىل ءبولىڭىز
قانداي دا ءبىر كىتاپ وقىپ، ءتىل ۇيرەنۋگە، ءوزىڭىزدى جاڭا قىرىنان دامىتۋعا ۋاقىت ءبولىڭىز. كوپ ءتىل بىلەتىندەر ساعاتتاپ ۋاقىتىن جۇمساپ، كىتاپتان باس الماعاندار ەمەس، جاي عانا پراكتيكتەر مەن تۇراقتىلار بولۋى مۇمكىن. ءسىز دە ءوز ماقساتىڭىزدا جەتەر جولدا تۇراقتىلىق تانىتىڭىز. شىڭنىڭ ەڭ بيىگى - ءبىز باعىندىرماعان شىڭ. سوندىقتان دامۋدان شارشاماڭىز. ىسكە ءسات!
نازەركە اسەتوۆا
