كەز كەلگەن مەملەكەتتىڭ رامىزدەرى ەلدىڭ ەگەمەندىگىن، تۇعىرلى تاۋەلسىزدىگىن، جەكەلەگەن جەتىستىكتەرىن، حالقىنىڭ بىرلىگىن بىلدىرەدى. رامىزدەر - ۇلتتىڭ ۇلىلىعىن، جۇرتتىڭ جاۋىنگەرلىگىن، قاراپايىم حالىقتىڭ قايراتى مەن بيلىكتىڭ بيىگىن بىلدىرەتىن رۋح پەن جاننىڭ سيمۆولى.
مەملەكەت رامىزدەر بانكنوتتارعا، مونەتالارعا، بلانكىلەرگە، مورلەرگە جانە قاجەت بولعان وزگە دە ورىنداردا ورنالاستىرىلۋ ارقىلى، ەلدىڭ تۇتاستىعى مەن دەربەستىگىنەن كورىنىس بەرەدى. مۇنداعى الۋان بەلگىلەر مەن ءتۇرلى تۇستەر ءار ەلدىڭ تامىرلى تاريحى مەن ءبۇتىن بولاشاعىنان سىر شەرتەدى، سوعان قاراي بەيىمدەلىپ جاسالىنادى. سان جىلدار بويى قالىپتاسقان، ءوسىپ ونگەن، كەمەلدىكتىڭ شىڭىنا شىعۋ، شاراينادا شارىقتاۋ ءۇشىن قانتوگىسكەن، جان الىپ، جان بەرگەن جاندار، تاۋەلسىزدىكتىڭ سالتاناتتى سالتىن قۇردى. بۇگىن دە ولاردىڭ ۇرپاقتارىندا سول سارعايعان سارا جولدىڭ سارىنىمەن دۇنيەگە كەلگەن التىنعا بەرگىسىز مەمەكەتتىك رامىزدەرى، سيمۆولدارى بار. ولار ۇشەۋ: تۋ، ءانۇران جانە ەلتاڭبا. بۇگىنگە دەيىن بۇل ۇشەۋىنىڭ ماعىناسى دا، تۇپكى ءمانىسى دە ايتىلىپ كەلە جاتىر.
ەۋروپالىق ەلدەردى قاراستىراتىن بولساق، باستاپقىدا كنيازدىكتەردىڭ بىتىراڭقى ءومىر ءسۇرۋ كەزەڭىندە ءبىرتۇتاس مەملەكەتتىك رامىزدەر بولعان جوق. ال كنيازدەردىڭ ارقايسىسى ءوز قالاۋى بويىنشا كۇش، بيلىك پەن قۇدىرەتىن ءبىلدىرۋ ءۇشىن جالاۋشادا، مونەتالاردا، مورلەردە بەينەلەنگەن ارىستاندار، بۇركىتتەر، گريففيندەر جانە باسقا دا جانۋارلاردى تاڭدايتىن بولعان. ال قازاق حاندىعى كەزەڭىندە ءبىزدىڭ اتا-بابالارىمىز بايراقتار پايدالانعان. “الاشتىڭ اق تۋىنىڭ استىندا” دەگەن سەكىلدى ءسوز تىركەستەرىدە بۇل ويىمىزعا دالەل بولاتىنداي. شىن مانىسىندە، ەجەلگى جاۋگەرشىلىك زامانىنداعى قازاق حاندارى مەن باتىرلارىنىڭ تۋلارى، جالاۋلارى مەن بايراقتارىنا قاتىستى ناقتى دەرەكتەر از. الايدا تۇرىك-قازاق جالاۋلارى جايلى ەڭبەك جازعان الكەي مارعۇلاننىڭ ەڭبەكتەرىندە كەلتىرىلگەن دەرەكتەرگە سۇيەنسەك، قازاق حاندارى كوتەرگەن جالاۋ قىزىل ءتۇستى، ەنسىز، شەتىندە ءۇش-توعىز قۇيرىق بايلانعان ورتاسىنا تورە تاڭبا كەستەلەنگەن. ءارى مۇنداي جالاۋلار شىڭعىس حان ۇرپاقتارىنا ءتان دەسەدى. كەزىندە قازاقتىڭ نەبىر وت ءتىلدى، وراق اۋىزدى جىراۋلارى جاۋىنگەرلەردىڭ نايزا ۇشىنا تۋ بايلاپ، جاۋعا شاپقان تەڭدەسسىز ەرلىكتەرى حاقىندا تالاي مارتە جازعان.
بۇگىنگى كۇنى مەملەكەتتىك رامىزدەر ەل جاستارىنىڭ بويىنداعى ءپاتريوتيزمدى نىعايتۋدا جانە مادەني-تاريحي جادىنى ساقتاۋدا، ەلىمىزدىڭ كەشەگى مەن بۇگىنگى ساياسي ەكونوميكالىق احۋالىن تەرەڭ ءارى جۇيەلى تالداۋعا، تۇعىرلى تاۋەلسىزدىكتىڭ ءمانىن ءتۇسىنىپ، ارداقتاۋدا اسا ماڭىزدى ءرول اتقارادى. ەگەر حالىقتىڭ مەملەكەتتىك رامىزدەرگە قاتىناسى، ەلدىڭ "رۋحى" مەن ونىڭ ەليتاسىنىڭ كورىنىسى تۋرالى ايتاتىن بولساق، وندا قولدانىستاعى جۇيەنى قولداۋ دارەجەسىن، بەلگىلى ءبىر ساياساتتىڭ، يدەولوگيانىڭ تيىمدىلىگىن باعالاۋعا بولادى.
