تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى bailanys.bar سەرۆيسى مەن kaspi.kz جك سەرۆيسىن ىسكە قوستى.
العاشقىسىنىڭ، ياعني bailanys.bar سەرۆيسىنىڭ باستى مىندەتى - ەلىمىزدەگى ينتەرنەت جىلدامدىعى تومەن جەرلەردى انىقتاۋ بولسا، جك سەرۆيسى قۇجاتتاردى قاشىقتان تەكسەرۋگە، كاسىپكەردى سايكەستەندىرۋگە، تىركەۋدى راستاۋعا ارنالعان بىرقاتار زاماناۋي تەحنيكالىق شەشىمدەردى قامتۋعا ارنالعان.
bailanys.bar سەرۆيسىن قازاقستاندىق BTS Digital تسيفرلىق كومپانياسىنىڭ ماماندارى ازىرلەگەن. ونى PlayMarket پەن App Store-دەن جۇكتەپ الۋعا بولادى.
ماماندار اتالعان جوبانىڭ ينتەرنەت ساپاسىن جاقسارتاتىنىنا سەنىمدىلىك ءبىلدىرىپ وتىر.
ماسەلەن، تسيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى دارىن تۇياقوۆت: «بۇل سەرۆيس - قاجەتتى شارا. ءبىزدىڭ ەلدە ينتەرنەتى جوق نەمەسە جابىنى ءالسىز ايماقتار بار ەكەنىن تۇسىنەمىز. مۇنداي ايماقتار از ەمەس جانە ءبىزدىڭ نەگىزگى مىندەتىمىز وسىنداي ورىندار سانىن بارىنشا ازايتۋ. وسى قولدانبالى باعدارلاما بىزگە جەلىنىڭ ساپاسى، ينتەرنەت جىلدامدىعى بويىنشا بارىنشا وبەكتيۆتى دەرەكتەر الۋعا جانە اعىمداعى جاعدايدى جاقسارتۋعا مۇمكىندىك بەرەدى»، - دەدى.
ۆلاديمير فيدلەر، bailanys.bar سەرۆيسىنىڭ جەتەكشىسى:
«ءبىزدىڭ باستى مىندەتىمىز – ينتەرنەت جىلدامدىعى بويىنشا ەڭ تومەن وڭىرلەردى انىقتاۋ. دەرەكتەر نەعۇرلىم كوپ جينالسا، جاعدايدى تۇزەتۋ ءۇشىن شارالار دالىرەك بولادى. ءبىز بارلىق قازاقستاندىقتاردى تەكسەرۋگە قاتىسۋعا شاقىرامىز. مۇندا كۇردەلى ەشتەڭە جوق، جەلىنى بىرنەشە رەت باسۋ ارقىلى باقىلاۋعا بولادى».
ەندى قازاقستاندىقتار كورسەتىلگەن سىلتەمەلەر بويىنشا bailanys.bar سەرۆيسىنە ءوتىپ، ينتەرنەت جىلدامدىعىن تەكسەرە الادى. بۇل جاعداي اسىرەسە قاشىقتان ءبىلىم الىپ جاتقاندار ءۇشىن وتە قاجەتتى دۇنيە.
سەرۆيستىڭ العاشقى كەزەڭىندەگى جوسپارعا سايكەس، ينتەرنەتتىڭ قولجەتىمدىلىگى انىقتالادى. ال ەكىنشى كەزەڭىندە ءوتىنىش جىبەرۋ فۋنكتسياسى ىسكە قوسىلادى. ياعني، ينتەرنەت پايدالانۋشىلار ونىڭ جىلدامدىعىنا قاتىستى ناقتى شاعىم جىبەرە الادى. وتىنىشتەر تىكەلەي تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە ءتۇسىپ، وسىندا قارالاتىن بولادى.
ەندى kaspi.kz سەرۆيسىنىڭ ارتىقشىلىعىنا توقتاساق.
سوڭعى جىلدارى قازاقستاندىقتاردىڭ كوپشىلىگى kaspi.kz قوسىمشاسىن پايدالانىپ جۇرگەنى بەلگىلى. وسى ورايدا تسيفرلىق دامۋ مينيسترلىگى بىرگەي سەرۆيستى ىسكە قوسۋ ارقىلى مورالدىق تۇرعىدان ەسكىرگەن Egov قىزمەتىنىڭ جۇمىسىن ايتارلىقتاي ازايتىپ، مەملەكەتتىك قىزمەتتەردى ۇسىنۋ جونىندەگى جۇمىسقا جاڭا مۇمكىندىكتەر جاساماقشى. ياعني، ەندى قازاقستاندىقتار اتالعان سەرۆيس ارقىلى مەملەكەتتىك قىزمەتتەردى وزدەرىنە ىڭعايلى جولدارمەن الا الادى.
جك سەرۆيسىن تىركەۋ ءۇشىن ەندى وسى قىزمەتتى Kaspi.kz قوسىمشادان تاڭداپ، ساۋالنامانى تولتىرىپ، Kaspi ەتسق كومەگىمەن قول قويۋ جەتكىلىكتى.
دەرەككوز: تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى
"ادىرنا" ۇلتتىق پورتالى
