ءبىز قورشاعان ورتانى جاسىل-جەلەك جانە حوش ءيىستى گۇلدەرسىز ەلەستەتە المايمىز. ولاردىڭ بىزگە بەرەر كومەگى دە, تيگىزەر پايداسى دا از ەمەس.قۇلپىرعان گۇلدەردىڭ ىشىندەگى سىرى دا، اتقارار قىزمەتى دە ءارتۇءرلى. ول تازالىق پەن سەزىمدى، وشپەندىلىك پەن جاۋاپسىز ماحابباتتى ءبىلدىرۋدىڭ حاس شەبەرى بولا الارى انىق. دەگەنمەن دە، ادام گۇل سىيلاعاندا وزىنشە تالداۋ جاسايدى. مىسالى: ءوتكەن عاسىردا ادامدار ءوز سەزىمىن بىلدىرۋدە گۇل تىلىنە سۇيەنگەن. گۇلدەگەن شيە اعاشىنىڭ گۇلىن سىيعا تارتىپ ءوزىنىڭ اق ادال ماحابباتىن بىلدىرگەن. ال، سىيلانعان سۇمبىگۇل سانى ارقىلى كەزدەسۋ كۇنىن بەلگىلەيتىن بولعان. سول زامان سەرىلەرى عاشىعىنا اق راۋشان گۇلىن سىيلاپ ءسوز سالىپ، داستۇرگۇلدى كەلىسىم رەتىندە ۇمىتتەنە كۇتەتىن بولعان. ال ءسىز گۇل سىيلاي الاسىز با? قانداي گۇلدى كىمگە سىيلاۋ كەرەك ەكەنىن تارقاتىپ وتسەك.
قالامپىر – ابىروي مەن نامىس، ايەلگە دەگەن ماحاببات. قالامپىردىڭ ءار ءتۇسى ءارتۇرلى ماعىنا بەرەدى. مىسالى: اق قالامپىر – ول بىرەۋگە ارمان، ماقساتىنا جەتۋگە تىلەكتەس ماعىناسىندا بەرىلسە، سارى قالامپىر – سىيلاعان ادام سىزگە وزىنە سەنىممەن قاراۋعا شاقىرعانىنىڭ بەلگىسى. قىزىل قالامپىردى ءسىز وزىڭىزگە سىيلى، قۇرمەتتى ادامعا سىيعا تارساڭىز بولادى، مەيلى سۇيىكتىڭىزگە، مەيلى باستىعىڭىزعا. كۇلگىن ءتۇستى قالامپىر انا ماحابباتىنىڭ بەلگىسى. بۇل گۇلدى تارتۋ ەتۋ ارقىلى ءسىز اناڭىزعا دەگەن قۇرمەتىڭىز بەن ماحابباتىڭىزدى جانە وعان دەگەن كىرشىكسىز سەنىمىڭىزدى بىلدىرەسىز. ەگەر، ءسىز سىيعا تارتقان قالامپىر گۇلى ءبىر ءتۇستى بولسا، وندا ءسىزدىڭ كەلىسىمىڭىزدىڭ بەلگىسى، ال سىزىقتارىمەن بولسا، وندا كەلىسىمنەن باس تارتقانىڭىزدىڭ ايعاعى.
سۇيىكتىڭىزگە سەزىم ءبىلدىرۋ ماقساتىندا اق كەكىرە (اق استرا) گۇلىن سىيلاۋىڭىزعا بولادى.
ەگەر ءسىز بي كەشىنە بارعاندا ۆيكاريا گۇلىن ۇناعان جانعا سىيلاساڭىز ونى بيگە شاقىرعاندىعىڭىزدىڭ بەلگىسى.
قۇمىرا گۇلدى سىيلاعان ادام – وزىنە سەنۋىن، ارقاشان قامقورلىق سەزىمىندە بولىپ، ايالايتىندىعىن ايتقىسى كەلەدى.
ازاليا گۇلىن ءسىز ءوزىڭىزدىڭ سۇيىكتىڭىزگە، مەنى كۇتۋگە دايىن بول دەگەن ويمەن سىيلاساڭىز بولادى.
ەگەر ءسىز ەر-ازاماتىڭىزعا ءوز ويىڭىزدى بىلدىرگىڭىز كەلسە، ونىڭ ءسىز ءۇشىن جاي دوس ەمەس ودان دا جاقىن ادام رەتىندە كورگىڭىز كەلەتىنىن جەتكىزگىڭىز كەلسە وندا اماريليس سىيلاعانىڭىز ابزال.
ءبىر كورگەننەن عاشىق بولىپ، سەزىمىڭىزدى بىلدىرگىڭىز كەلسە گلوكسينيا گۇلى تاپتىرماس سىيلىق.
ۇندىلىكتەردىڭ ويىنشا ماحابباتتىڭ جارىق جۇلدىزى بولعان جاسمين گۇلى سەزىمتالدىق پەن ايەلگە ءتان نازىكتىكتىڭ بەلگىسى.
جاۋ ارقاشان جانىڭىزدا بولۋى مۇمكىن دەگەنمەن وعاندا سىيلىق دايىنداعانىڭىز ابزال. اكونيت گۇلى بۇل كەزدە تاپتىرماس سىيلىق بولارى انىق.
وزىڭىزگە ۇنامايتىن، بىراق وشپەندىلىگىڭىزدى ايتا المايتىن ادامعا ناسىبايگۇل (بازيليك نەمەسە رايحان گۇل) سىيعا تارتۋىڭىزعا بولادى.
جاۋاپسىز ماحاببات بەلگىسى – كەپتىرىلگەن گۇلدەر شوعىرى. ەگەر دە، وزىڭىزگە ۇنامايتىن جان مازاڭىزدى السا، وسىنداي گۇل شوعىرىن سىيعا تارتساڭىز، وزىنە كوڭىلى تولمايتىنىن بىردەن تۇسىنەدى.
ەجەلگى شىعىستا گۇلدىڭ ءتۇسىن جىلدىڭ مەزگىلىنە ساي تاڭداعان – سولعىن تۇستى گۇلدەردى – قىستىڭ كۇندەرىندە، اقشىلدارىن – كۇزدە، كوك گۇلدەردى كوكتەمدە، قىزىلدارىن جازدا سىيلاۋ ءداستۇرى بولعان.
گۇلدى جاقسى كورمەيتىن جان بولمايدى، جاقسى گۇلدى جاقسى ادامدارعا سىيلاي بىلىڭىزدەر!
“ادىرنا” ۇلتتىق پورتالى
