سەناتتا بەت-ءجۇزدى جاۋىپ تۇراتىن كيىمدەرگە تىيىم سالۋ تۋرالى زاڭناماعا تۇزەتۋلەر ەنگىزۋ ماسەلەسى تالقىلانىپ جاتىر. بۇل باستاماعا قاتىستى قوعامدىق پىكىر ءارتۇرلى. ءبىرى بيلىكتى قولداسا، ەندى ءبىرى قۇقىعىنىڭ تاپتالاتىنىن العا تارتۋدا. فيلوسوفيا عىلىمدارىنىڭ كانديداتى، ءدىنتانۋشى كەڭشىلىك تىشقانۇلى «ادىرنا» تىلشىسىنە بەرگەن سۇحباتىندا مۇنداي قادامنىڭ ءدىني نەگىزدەرگە قايشى ەمەس ەكەنىن مالىمدەدى.
«دىندە ادامنىڭ بەت-ءجۇزىن جابۋ كەرەك دەگەن تالاپ جوق. بۇل كوبىنە داستۇرمەن بايلانىستى بولادى. تاياۋ شىعىس قوعامىندا كليماتتىق ەرەكشەلىكتەرگە بايلانىستى ايەل ادامداردىڭ قارا كيىم كيىپ، بەت-ءجۇزىن بۇركەمەلەپ ءجۇرۋ ءداستۇرى بار. ونىڭ شىعۋ تەگىنە بايلانىستى ءارتۇرلى پىكىر ايتىلادى. دەسە دە، ءبىزدىڭ قوعام ءۇشىن بەت-الپەتتى جاۋىپ ءجۇرۋ – جات دۇنيە. مۇسىلمان ءدىنىنىڭ حانافي باعىتىندا دا ادامنىڭ بەت-ءجۇزى اۋرەت جەرگە جاتپايدى»،—دەدى ول.
ءدىنتانۋشى مەملەكەت ءدىني راديكاليزمگە زاڭ جۇزىندە شەكتەۋ قويماسا, بۇل قاۋىپسىزدىك پەن قوعامدىق تارتىپكە قاۋىپ ءتوندىرۋى مۇمكىن ەكەنىن اتاپ ءوتتى.
«ەلىمىزدە راديكالدى توپتارعا كىرۋشى، ەلىكتەۋشى جانداردىڭ قاتارى كوبەيىپ بارادى. بۇل — الاڭداۋشىلىق تۋعىزاتىن جاعداي. سوندىقتان دا مەملەكەت دىنگە، اسىرەسە، راديكالدى پوزيتسيالارعا زاڭ تۇرعىسىنان شەكتەۋ
سونداي-اق ءدىنتانۋشى قازاقستاننىڭ زايىرلى مەملەكەت ەكەنىن ەسكەرە وتىرىپ، ءدىن ۇستانۋشىلار زاڭعا قۇرمەتپەن قاراپ، مەملەكەتپەن كەلىسىمدە جۇمىس ىستەۋى ءتيىس ەكەنىن ەسكە سالدى.
«مەملەكەت ءدىن تۋرالى ۇستانىمدارى مەن ساياساتىن بەلگىلى ءبىر زاڭناما نەگىزىندە بەكىتكەن. سول سەبەپتى ءدىن ۇستانۋشىلار وعان تۇسىنىستىكپەن قاراۋى ءتيىس. ءبىزدىڭ ەلىمىزدە بيلىك جەكە سەنىم مەن قۇلشىلىق-عيباداتقا، ءدىني سەنىم بوستاندىعىنا ارالاسپايدى. دەسە دە، بۇل ءوز بىلگەنىمىزدى ىستەۋگە رۇقسات بەرىلگەن دەگەن ءسوز ەمەس. قازاقستان زايىرلى ەل بولعاندىقتان، بيلىك ءارتۇرلى كونفەسسياعا بىردەي تالاپ قويىپ، باقىلاۋ ورناتۋعا قۇقىلى. بۇل ماسەلەدە كونفەسسيا وكىلدەرى مەملەكەتپەن كەلىسىمگە كەلىپ، ءدىني سەنىم بوستاندىعىن جۇزەگە اسىرۋى قاجەت»،—دەپ تۇيىندەدى ول.
ەسكە سالايىق، بۇعان دەيىن قازاقستاندا بەت-الپەتتى جاۋىپ تۇراتىن كيىمدەرگە تىيىم سالىنۋى مۇمكىن ەكەنىن جازعان ەدىك.
اڭگىمەلەسكەن: بەردىبەك راۋان ەرلانۇلى
