Канада тұрғыны Джеффри Вуд бұрынғы Ұлыбритания премьер-министрі Уинстон Черчилльдің атақты «Арыстандай ақырған» (The Roaring Lion) деп аталатын фотосуретін ұрлағаны үшін екі жылға жуық түрме жазасына кесілді, деп хабарлайды “Адырна” ұлттық порталы ВВС-ге сілтеп.
Вуд 2021 жылғы Рождество мен 2022 жылдың басы аралығында Оттавадағы Fairmont Château Laurier қонақүйінен түпнұсқа фотосуретті ұрлағанын мойындады. Сот оған екі жылға бір күн жетпейтін жаза тағайындады – бұл жазаның федералдық емес, провинциялық түзету мекемесінде өтелетінін білдіреді.
Черно-белый фотопортретті канадалық армян текті фотограф Юсуф Карш 1941 жылдың желтоқсанында, Черчилль Канаданың парламентінде сөз сөйлегеннен кейін, Оттавада түсірген.
Өткен жылы бұл фотосурет Италияның Генуя қаласындағы жеке коллекциядан табылды — сатып алушы оның ұрланғанын білмеген. Қонақүй қызметкерлері түпнұсқа фотосуреттің жалған көшірмемен ауыстырылғанын тек 2022 жылғы тамызда ғана аңғарған. Италиялық билік фотосуретті Канадаға қайтарды.
Канадалық БАҚ-тың жазуынша, Вуд бұл фотосуретті психикалық денсаулығына байланысты қиындық көріп жүрген ағасына көмектесу үшін ақша табу мақсатында ұрлағанын айтқан.
«Канадалық фотограф түсірген портреттің осындай даңққа ие болуы — ұлттық мақтаныштың нышаны.
Қоғамымызда мұндай туындыларды көпшілікке көрсету үшін сенім элементі бар. Бұл сенім — барша канадалықтар сол туындыларды тамашалай алуы үшін қажет. Мұндай мүлікті ұрлау, бүлдіру немесе заңсыз айналымға жіберу – осы сенімді бұзу болып саналады», — деді үкім шығару кезінде судья Роберт Уодден.
Вудтың адвокаты бұл үкімнің тым қатал екенін, өйткені оның клиенті мұндай қылмысты алғаш рет жасағанын айтты.
