بۇل كۇن 2014 جىلى قر پارلامەنتىنىڭ شەشىمىمەن «تۇركى جازۋى كۇنى» رەتىندە جاريالانىپ، ۇكىمەتتىڭ قاۋلىسىمەن بەكىتىلگەن.
18 مامىردىڭ تاڭدالۋى كەزدەيسوق ەمەس – ءدال وسى كۇنى ەجەلگى تۇركى سوزدەرى جازىلعان كۇلتەگىن ەسكەرتكىشىنىڭ كوشىرمەسى موڭعوليا دالاسىنان استاناعا اكەلىنگەن بولاتىن.
كونە تۇركى جازۋى — رۋنا نەمەسە سىنا جازۋى دەپ اتالادى. بۇل جازۋ تۇركى حالىقتارىنىڭ تاريحي-مادەني مۇراسىنىڭ التىن قازىعى سانالادى.
ورحون، سەلەنگا، تولى وزەندەرىنىڭ بويىنان تابىلعان تاستاعى جازۋلار سولتۇستىك موڭعوليادا ورنالاسقان جانە ولار بىلگە قاعان، كۇلتەگىن، تونىكوك سياقتى تاريحي تۇلعالارعا ارنالعان.
ەرتەدەگى تۇرىك جازۋى العاش رەت XVIII عاسىردىڭ 20-جىلدارى ورىس پاتشاسى ءى پەترگە قىزمەت ەتكەن نەمىس عالىمى د.مەسسەرشميدت پەن ونىڭ جانىنداعى شۆەد وفيتسەرى ي.سترالەنبەرگ ارقىلى ەنيسەي اڭعارىنان تابىلدى. ولار بۇل جازۋدى سكانديناۆيا رۋنالارىنا ۇقساستىرىپ، «رۋنالىق جازۋ» دەپ اتادى.
1889 جىلى ن.م.يادرينتسەۆ ورحون وزەنىنىڭ اڭعارىنان ءىرى قۇلپىتاستارداعى جازۋلاردى تاپتى. بۇل — تۇركىتانۋ عىلىمىنداعى ۇلكەن جاڭالىق بولدى.
كونە تۇركى ماتىندەرىن العاش وقىپ، شەشىمىن تاپقان – دات عالىمى ۆ.تومسەن، ال ونى تۇركى تىلىندە العاش وقىعان – ورىس تۇركولوگى ۆ.رادلوۆ بولدى.
