بۇگىن - قوعام جانە مەملەكەت قايراتكەرى، عالىم جانە ۇلت جاناشىرى دىنمۇحامەد قوناەۆتىڭ تۋعان كۇنى.
ول 1912 جىلى الماتى وبلىسىندا دۇنيەگە كەلگەن.
دىنمۇحامەد قوناەۆ 1960–1962 جانە 1964–1986 جىلدار اراسىندا قازاقستان كومپارتياسى ورتالىق كوميتەتىنىڭ ءبىرىنشى حاتشىسى رەتىندە ەل باسقارعان. ونىڭ ەل باسقارعان جىلدارىندا قازاق جەرىندە 68 جۇمىسشىلار كەنتىمەن 43 قالا پايدا بولدى. ولاردىڭ قاتارىندا ونەركاسىپ ورتالىعى سانالعان رۋدنىي، ەكىباستۇز، شەۆچەنكو، نيكولسكي، ستەپنوگورسك، تەمىرتاۋ، جاڭاتاس، كەنتاۋ، ارقالىق قالالارى بار.
دىنمۇحامەد قوناەۆتىڭ باستاماسى بويىنشا قازاق جەرىنىڭ سول كەزدەگى استاناسى الماتى قالاسىندا ۇكىمەت ءۇيى، قازاقستان كومپارتياسىنىڭ ورتالىق كوميتەتىنىڭ عيماراتى، قازاقستان رەسپۋبليكاسىنىڭ ۇلتتىق عىلىم اكادەمياسىنىڭ عيماراتى تۇرعىزىلعان.
سونىمەن قاتار، رەسپۋبليكا سارايى، سپورت جانە مادەنيەت سارايى، «مەدەۋ» سپورت كەشەنى، ۇلتتىق كىتاپحانا، تسيرك سىندى مادەنيەت، ءبىلىم جانە سپورت نىساندارى بوي كوتەردى. اۆتو، اەرو جانە تەمىر جول ۆوكزالدارى، اۋەجاي، «الماتى»، «وتىرار»، «جەتىسۋ»، «الاتاۋ»، «دوستىق»، «قازاقستان» قوناقۇيلەرى سالىندى.
دىنمۇحامەد قوناەۆ «و مويوم ۆرەمەني»، «وت ستالينا دو گورباچيوۆا»، «اقيقاتتان اتتاۋعا بولمايدى» كىتاپتارىن جازىپ قالدىرعان.
1986 جىلدىڭ 16 جەلتوقسانىندا قازاقستان كوممۋنيستىك پارتياسى ورتالىق كوميتەتىنىڭ 18 مينۋتقا سوزىلعان رەكوردتىق قىسقا پلەنۋمىندا دىنمۇحامەد قوناەۆ قازاقستان كوممۋنيستىك پارتياسى ورتالىق كوميتەتىنىڭ ءبىرىنشى حاتشىسى قىزمەتىنەن بوساتىلدى. ونىڭ ورنىنا گەننادي كولبين سايلاندى. ونىڭ مەملەكەت باسىنا كەلۋى جەلتوقسان كوتەرىلىسىنە سەبەپ بولدى.
1987 جىلدىڭ قاڭتارىندا قوناەۆ كپسس ورتالىق كوميتەتىنىڭ ساياسي بيۋروسىنان، ال 1987 جىلدىڭ ماۋسىم ايىندا كوكپ ورتالىق كوميتەتىنەن شىعارىلدى.
دىنمۇحامەد احمەتۇلى قوناەۆ 1993 جىلعى تامىزدىڭ 22-سىندە، 82-جاسقا قاراعان شاعىندا الماتى وبلىسى الاكول اۋدانىنىڭ اقشي اۋىلىندا قايتىس بولدى. مەملەكەت جانە قوعام قايراتكەرى 1993 جىلى 25 تامىزدا كەڭساي زيراتىنا جەرلەندى.
