ۇلىبريتانيادا قازاقستان قۇقىق قورعاۋ ورگاندارىنان جاسىرىنعان اتىراۋ وبلىسىنىڭ بۇرىنعى اكىمى بەرگەي رىسقاليەۆتىڭ سوڭىنان ەرىپ، قازاقستان ەلشىلىگىنىڭ ماڭىندا ارانداتۋشىلىق جوسپارلاعان دەگەن ادامدار سوتتالدى. بۇل تۋرالى BBC جازدى، دەپ حابارلايدى “ادىرنا”.
«بارلاۋ جەلىسى رەسەيدىڭ پايداسىنا اقپارات جيناعان جانە مەملەكەت قاۋىپسىزدىگىنە قاۋىپ توندىرگەن»، – دەدى لوندونداعى ولد-بەيلي سوتىندا سۋديا حيلليارد.
بۇل مالىمدەمەنى سۋديا التى ايىپتالۋشىعا ۇكىم شىعارۋ الدىندا ايتتى. ايىپتالۋشىلاردىڭ بارلىعى - بولگاريا ازاماتتارى. ول سوتتالعاندار جازاسىن وتەگەننەن كەيىن ەلدەن دەپورتاتسيالاناتىنىن دا اتاپ ءوتتى.
سوت ۇكىم شىعارۋ بارىسىندا ايىپتاۋعا نەگىز بولعان التى ارنايى وپەراتسيا تۋرالى ەگجەي-تەگجەيلى مالىمەتتەر تىڭدالدى – ولاردىڭ اراسىندا ۇرلاۋ ارەكەتى جانە جالعان نارازىلىق اكتسياسىن ۇيىمداستىرۋ ارەكەتى دە بار.
«توپتىڭ بولجالدى ۇيىمداستىرۋشىسى ورلين رۋسەۆ تەرگەۋ كەزىندە «دجەيمس بوند ستيلىندەگى» ارەكەتتەرگە قاتىسى بارىن جوققا شىعاردى. الايدا سوتتا ونىڭ 33 بولمەلى بۇرىنعى قوناقۇيىندە باقىلاۋ جۇرگىزۋگە ارنالعان وراسان زور كولەمدەگى قۇرال-جابدىقتار تابىلعانى جونىندە دالەلدەر كەلتىرىلدى.
شپيوندىق جەلى مۇشەلەرىنە شىعارىلعان ۇكىمدەر
ءوز كەزەگىندە لوندون پوليتسياسى بۇل ۇكىمدەر «ونەركاسىپ اۋقىمىنداعى شپيوناجدىڭ» بار ەكەنىن راستايتىنىن جانە بۇل توپتىڭ ۇلىبريتانيا ءۇشىن قانشالىقتى «قاتەرلى قاۋىپ» توندىرگەنىن كورسەتەتىنىن مالىمدەدى.
ەسكە سالساق، بەرگەي رىسقاليەۆ 2006-2012 جىلدارى اتىراۋ قالاسى مەن اتىراۋ وبلىسىنىڭ اكىمى قىزمەتىن اتقارعان. 2013 جىلى ەكس-اكىمگە "اسا ءىرى كولەمدەگى بيۋدجەت قارجىسىن جىمقىردى جانە جانە قىلمىستىق توپ قۇردى" دەگەن ايىپ تاعىلعان. تەرگەۋ بەس جىلعا سوزىلىپ، 2019 جىلى قازاقستان سوتى بەرگەي رىسقاليەۆتى - 17 جىلعا، اعاسى ارمانجان رىسقاليەۆتى 16 جىلعا سىرتتاي سوتتاعان. ولاردىڭ قۇنى ميللياردتاعان تەڭگە تۇراتىن دۇنيە-مۇلكىن تاركىلەگەن.
الايدا 2020 جىلى جازدا قازاقستان سوتى بەرگەي رىسقاليەۆتىڭ وتباسى مەن جاقىندارىنان تاركىلەنگەن مۇلىكتىڭ ء"بىر بولىگىن" قايتارۋ تۋرالى شەشىم شىعارعان. رىسقاليەۆتىڭ مۇلكىن قايتارۋ تۋرالى كاسساتسيالىق شاعىمدى قازاقستان باس پروكۋراتۋراسى ءتۇسىرىپ، وعان جوعارعى سوتتىڭ تەز كەلىسكەنى قوعام نازارىن اۋدارعان.