سەيسەنبى كۇنى ۇلىبريتانيا مەن اقش اسكەرى يەمەندە بىرلەسكەن اسكەري وپەراتسياعا قاتىستى، دەپ حابارلايدى "ادىرنا" ۇلتتىق پورتالى.
بۇل تۋرالى سارسەنبىدە ۇلىبريتانيا قورعانىس مينيسترلىگى مالىمدەدى.
بۇل — بريتان قارۋلى كۇشتەرىنىڭ اقش-تىڭ يەمەندەگى حۋسيتتەرگە قارسى بەلسەندى كامپانياسىنا العاش رەت قاتىسۋى. مالىمدەمەگە سايكەس، سوققى قاراڭعى تۇسكەننەن كەيىن جاسالعان. ويتكەنى بۇل كەزدە بەيبىت تۇرعىنداردىڭ اۋماقتا بولۋ ىقتيمالدىعى تومەن بولادى.
بريتاندىق مالىمدەمەدە شابۋىلدىڭ ماقساتى — سانا قالاسىنان وڭتۇستىككە قاراي شامامەن 25 شاقىرىم جەردە ورنالاسقان، حۋسيتتەر قىزىل تەڭىز بەن ادەن شىعاناعىنداعى كەمەلەرگە شابۋىل جاساۋ ءۇشىن پايدالاناتىن درونداردى وندىرەتىن عيماراتتار توبى بولعانى ايتىلعان. قۇرباندار تۋرالى مالىمەت بەرىلگەن جوق.
"بۇل شارالار حۋسيتتەر تاراپىنان تەڭىزدەگى ەركىن ناۆيگاتسياعا تونگەن تۇراقتى قاۋىپكە جاۋاپ رەتىندە جاسالىندى. قىزىل تەڭىز ارقىلى وتەتىن كەمەلەر سانى 55%-عا ازايدى، بۇل ميللياردتاعان شىعىنعا اكەلىپ، ايماقتىق تۇراقسىزدىقتى كۇشەيتىپ، ۇلىبريتانياداعى وتباسىلاردىڭ ەكونوميكالىق قاۋىپسىزدىگىن قاتەرگە تىكتى"— دەدى ۇلىبريتانيانىڭ قورعانىس حاتشىسى دجون حيلي.
يەمەندىك حۋسيتتەر ەل استاناسى ساناعا بىرنەشە سوققى جاسالعانىن حابارلادى. باسقا شابۋىلدار ساادا قالاسىنا باعىتتالعان.
اقش اسكەرى وتكەن دەمالىس كۇندەرى مالىمدەگەندەي، ولار ناۋرىز ايىنىڭ ورتاسىنان باستاپ 800-دەن استام نىساناعا سوققى جاساعان.
ەسكە سالساق، 15 ناۋرىزدا اقش پرەزيدەنتى دونالد ترامپ امەريكالىق قارۋلى كۇشتەرگە حۋسيت كوتەرىلىسشىلەرىنە جويقىن سوققىلار جاساۋعا بۇيرىق بەرگەن بولاتىن. اق ءۇي اكىمشىلىگى يراننىڭ قولداۋىنا سۇيەنەتىن حۋسيتتەر قىزىل تەڭىزدە كەمەلەرگە شابۋىل جاساۋدى توقتاتپايىنشا، ولارعا قارسى شابۋىلدارىن جالعاستىراتىنىن مالىمدەدى.
بۇعان دەيىن دە ۇلىبريتانيا مەن اقش يەمەندە بىرلەسكەن وپەراتسيالار جۇرگىزىپ، سوققىلار جاساعان بولاتىن.
دۇيسەنبى كۇنى اقش حۋسيتتەرگە مۇناي مەن گاز جەتكىزەتىن كەمەلەر مەن تاسىمالداۋ كومپانيالارىنا سانكتسيالار ەنگىزدى. جەكسەنبى كۇنى اقش-تىڭ افريكالىق ميگرانتتاردى ۇستاۋ ورتالىعىنا جاساعان اۋە شابۋىلى سالدارىنان يەمەندە 68 ادام قازا تاپتى.