توقاەۆ كۇردەلى وپەراتسيا جاساعان حيرۋرگتەرگە العىس ءبىلدىردى

999
Adyrna.kz Telegram
https://adyrna.kz/content/uploads/2025/04/f6ef5134-cc69-4c53-90fd-dff04c248392-960x500.jpeg?token=8b7be0bd664f768d5d77832d4d8ddac0

پرەزيدەنت قاسىم-جومارت توقاەۆ ا.ن. سىزعانوۆ اتىنداعى ۇلتتىق عىلىمي حيرۋرگيا ورتالىعىن قۇتتىقتادى، دەپ حابارلايدى "ادىرنا" ۇلتتىق پورتالى. 

پرەزيدەنتتىڭ كەڭەسشىسى – ءباسپاسوز حاتشىسى رۋسلان جەلدىبايدىڭ مالىمدەۋىنشە، جاقىندا حيرۋرگيا عىلىمي ورتالىعىنىڭ بازاسىندا قازاقستاندا العاش رەت كۇردەلى ءۇش جاقتى بۇيرەك ترانسپلانتاتسياسى (ايقاسپالى بۇيرەك اۋىستىرۋ) ءساتتى جۇزەگە اسىرىلعان.

مەملەكەت باسشىسى ورتالىق ۇجىمىنا العىس حات جولداپ، بەلگىلى حيرۋرگ، پروفەسسور بولاتبەك بايماحانوۆتىڭ جەتەكشىلىگىمەن وتكەن بۇل وپەراتسيانى وتاندىق مەديتسينانىڭ اسا ءىرى جەتىستىگى دەپ اتادى.

"مەملەكەت دەنساۋلىق ساقتاۋ سالاسىن دامىتۋعا ەرەكشە كوڭىل ءبولىپ كەلەدى. اۋقىمدى باستامالاردىڭ جۇزەگە اسىرىلۋى مەن اتقارىلعان ۇلكەن جۇمىستار ەلىمىزدىڭ مەديتسيناسىنىڭ ەداۋىر ىلگەرىلەۋىنە جول اشتى. سىزدەر جۇرگىزگەن بىرەگەي وپەراتسيا وسىنىڭ ايقىن دالەلى. بۇگىندە قازاقستان وسىنداي كۇردەلى ترانسپلانتاتسيالىق وپەراتسيالار جاسالاتىن الەمدەگى التى ەلدىڭ قاتارىنا كىرەدى. بۇل جەتىستىك وتاندىق مامانداردىڭ جانقيارلىق ەڭبەگى، تەرەڭ ءبىلىمى مەن باعا جەتپەس تاجىريبەسىنىڭ ناتيجەسى. سىزدەرگە شىن جۇرەكتەن العىسىمدى بىلدىرەمىن. ەل دەنساۋلىعىن نىعايتۋ جولىندا الداعى ۋاقىتتا دا ايانباي ەڭبەك ەتەتىنىڭىزگە سەنەمىن", – دەلىنگەن قۇتتىقتاۋ حاتتا.

ءۇش جاقتى ايقاسپالى بۇيرەك ترانسپلانتاتسياسى – بۇل ءۇش دونور مەن ءۇش رەتسيپيەنت اراسىندا ءبىر ۋاقىتتا جۇرگىزىلەتىن بىرەگەي مەديتسينالىق وپەراتسيا.

مىسالى، ناۋقاستىڭ ءتىرى دونورى (ادەتتە تۋىسى) بولسا دا، ەكەۋىنىڭ اعزالارى سايكەس كەلمەۋى مۇمكىن. وندايدا دارىگەرلەر وسىنداي ءوزارا سايكەس كەلمەيتىن بىرنەشە جۇپتى تابادى. سودان كەيىن ءاربىر دونور ءوز تۋىسىنا ەمەس، سايكەس كەلەتىن باسقا ناۋقاسقا بۇيرەگىن بەرەدى. ناتيجەسىندە، ءۇش ناۋقاس تا وزىنە سايكەس كەلەتىن بۇيرەككە قول جەتكىزەدى.

پىكىرلەر