قازاقستاننىڭ العاشقى بىتىمگەرلىك كونتينگەنتى بىرىككەن ۇلتتار ۇيىمىنىڭ (بۇۇ) ميسسياسى اياسىندا سيريانىڭ گولان جوتالارىندا ءبىر جىلدىق قىزمەتىن اياقتاپ، ەلگە ورالدى. بۇل ميسسيا قازاقستاننىڭ دەربەس بىتىمگەرلىك وپەراتسياسى رەتىندە تاريحتا العاش رەت جۇزەگە استى، دەپ حابارلايدى “ادىرنا” ۇلتتىق پورتالى.
2024 جىلدىڭ ناۋرىز ايىندا گولان جوتالارىنا اتتانعان 139 قازاقستاندىق اسكەري قىزمەتشى، ونىڭ ىشىندە 4 ايەل، ءوز تەحنيكاسى مەن قارۋ-جاراعىمەن بىرگە ورنالاستىرىلدى. ءبىر جىل ىشىندە ولار 557 تاپسىرما ورىندادى، ونىڭ ىشىندە 458 ءموبيلدى پاترۋلدەۋ، 66 اسكەري پەرسونال مەن گۋمانيتارلىق جۇكتەردى تاسىمالداۋ، 15 جارىلعىش زاتتاردى زالالسىزداندىرۋ جانە 3 رەت باقىلاۋ بەكەتتەرىنىڭ كۇزەتىن كۇشەيتۋ جۇمىستارى بار .
ميسسيا بارىسىندا قازاقستاندىق بىتىمگەرلەر يزرايل مەن سيريا اراسىنداعى اتىستى توقتاتۋ تۋرالى كەلىسىمنىڭ ساقتالۋىن قاداعالاپ، جاۋاپكەرشىلىك ايماعىنداعى بىتىمگەرلىك بازالاردان اسكەري پەرسونالدى ەۆاكۋاتسيالاۋ، باقىلاۋداعى اۋماقتى ءموبيلدى پاترۋلدەۋ، جارىلماعان وق-دارىلەردى جويۋ مەن باسقا دا جارىلعىش زاتتاردان تازارتۋ، بۇۇ-نىڭ پەرسونالى مەن جوعارى لاۋازىمدى تۇلعالارىن جاۋاپكەرشىلىك ايماعىندا جانە بۇۇ-نىڭ ونىڭ شەكتەۋلى اۋماقتارىندا الىپ ءجۇرۋ جۇمىستارىن اتقاردى.
قازاقستاندىق بىتىمگەرلەردىڭ سيرياداعى شيەلەنىسكەن جاعدايدا وزدەرىنىڭ العاشقى دەربەس ميسسياسىن ورىنداعانى ەرەكشە ماڭىزدى. جاۋاپكەرشىلىك ايماعىندا شيەلەنىس ارتقان كەزدە قازاقستان كونتينگەنتى كوتەرىلىسشىلەردىڭ ونى باسىپ الۋىنا جول بەرمەي، بازانى بەرىك ۇستاۋدا شەشۋشى ءرول اتقاردى.
قورعانىس ءمينيسترى رۋسلان جاقسىلىقوۆ بىتىمگەرلەردىڭ ەڭبەگىن جوعارى باعالاپ، ولاردىڭ قىزمەتى قازاقستاننىڭ حالىقارالىق ارەناداعى بەدەلىن نىعايتۋعا ۇلەس قوسقانىن اتاپ ءوتتى. بۇۇ باسشىلىعى دا قازاقستاندىق بىتىمگەرلەردىڭ كاسىبي بىلىكتىلىگى مەن تاباندىلىعىن جوعارى باعالادى.
قازاقستاننىڭ بىتىمگەرلىك ميسسياسى جالعاسۋدا. 2025 جىلدىڭ ءساۋىر ايىندا ەكىنشى كونتينگەنت گولان جوتالارىنا اتتاندى.
