تۇركىستان قالاسىندا ۇلى جەڭىستىڭ 80 جىلدىعىنا وراي ۇيىمداستىرىلعان قازاقستان رەسپۋبليكاسىنىڭ VI جاستار سپورت ويىندارىنىڭ رەسمي اشىلۋ سالتاناتى ءوتتى. بيىلعى ويىندار جەڭىستىڭ 80 جىلدىعى قارساڭىندا وتكىزىلىپ جاتىر. كەشەندى جارىس 24 اقپان مەن 1 قازان ارالىعىندا سپورتتىڭ 34 تۇرىنەن ۇيىمداستىرىلۋدا. اتالعان دوداعا 2000-نان استام سپورتشى قاتىسادى.
تۇركىستان قالاسىنداعى «تۇركىستان ارەنا» ستاديونىندا وتكەن اشىلۋ راسىمىنە قازاقستان رەسپۋبليكاسى تۋريزم جانە سپورت ءمينيسترى ەربول مىرزابوسىنوۆ، تۇركىستان وبلىسىنىڭ اكىمى نۇرالحان كوشەروۆ، استانا، الماتى، شىمكەنت قالالارى مەن وبلىستاردىڭ دەنە شىنىقتىرۋ جانە سپورت باسقارمالارىنىڭ باسشىلارى، سونداي-اق سپورت سالاسىنىڭ قۇرمەتتى ماماندارى قاتىستى.
ەربول مىرزابوسىنوۆ اشىلۋ سالتاناتىندا سويلەگەن سوزىندە مۇنداي جارىستار جاس سپورتشىلار ءۇشىن ايرىقشا ماڭىزعا يە ەكەنىن اتاپ ءوتتى.
– بارشاڭىزدى كيەلى تۇركىستان توپىراعىندا كورگەنىمە قۋانىشتىمىن! قازاقستان رەسپۋبليكاسىنىڭ VI جاستار سپورت ويىندارىنا قوش كەلدىڭىزدەر! بيىلعى ويىندار جەڭىستىڭ 80 جىلدىعى قارساڭىندا ءوتىپ جاتىر. اتا-بابالارىمىز سۇراپىل سوعىستا ەرەن ەرلىك كورسەتىپ، بىزگە بۇگىنگى بەيبىت كۇندى سىيلادى. باتىرلاردىڭ ەرلىگى مەن ەڭبەگىن ۇمىتپاۋىمىز كەرەك. وزدەرىڭىز بىلەتىندەي، مەملەكەت باسشىسى سپورت سالاسىنىڭ دامۋىنا ەرەكشە نازار اۋدارىپ كەلەدى. سونىڭ ناتيجەسىندە وتاندىق سپورتتىڭ دەڭگەيى جىلدان جىلعا ارتىپ كەلەدى. ءبىزدىڭ سپورتشىلار حالىقارالىق جارىستاردا جارقىن جەتىستىكتەرگە جەتىپ، ەل ابىرويىن اسقاقتاتىپ ءجۇر. ال جاستار سپورت ويىندارى سياقتى كەشەندى ءىس-شارالار وتاندىق سپورتتى جاڭا دەڭگەيگە كوتەرۋگە سەرپىن بەرەدى. سونداي-اق جاس ۇرپاقتى سالاماتتى ءومىر سالتىن ۇستانۋعا باۋليدى. بيىلعى باسەكەدە باعى مەن بابى قاتار شاپقان ەڭ ۇزدىك سپورتشىلار جەڭىس تۇعىرىنان كورىنەدى دەپ سەنەمىن، – دەدى تۋريزم جانە سپورت ءمينيسترى.
تۇركىستان وبلىسىنىڭ اكىمى نۇرالحان كوشەروۆ وڭىردە سپورت سالاسى قارقىندى دامىپ جاتقانىن اتاپ ءوتتى.
– تاريحي شاھارعا قوش كەلدىڭىزدەر! مەملەكەت باسشىسى قاسىم-جومارت كەمەلۇلى سپورت سالاسىن جان-جاقتى دامىتۋدى تاپسىرعان بولاتىن. وسىعان وراي، بۇگىن تۇركىستان قالاسىندا ءVى جاستار ويىندارى باستالدى. بۇل – ەل بولاشاعى سانالاتىن جاستارىمىزدىڭ شەبەرلىگىن شىڭداپ، جاڭا چەمپيوندار تاربيەلەيتىن ماڭىزدى جارىس. بيىلعى دوداعا ەلىمىزدىڭ بارلىق وڭىرىنەن 2 مىڭنان استام جاس سپورتشى قاتىسۋدا. ال تۇركىستان وبلىسىنان سپورتتىڭ 34 تۇرىنەن 300-دەن استام سپورتشى قاتىسادى. مۇنداي ءىرى ءىس-شارانىڭ تۇركىستاندا ءوتۋى زاڭدىلىق. سەبەبى ايماقتا سپورت ينفراقۇرىلىمى جاقسى دامىپ جاتىر. بۇقارالىق سپورتتى دامىتۋ ماقساتىندا 2024 جىلى 73 سپورت نىسانىنىڭ قۇرىلىسى اياقتالدى. 2025 جىلى زاماناۋي ۇلگىدەگى 51 سپورتتىق نىسان پايدالانۋعا بەرىلەدى. ونىڭ ىشىندە اتشابار مەن ەسكەك ەسۋ كانالى بار. سىزدەر سپورت سايىستارىندا وبلىس قانا ەمەس، تۇتاس قازاق ەلىنىڭ نامىسىن قورعايسىزدار. بۇل جارىس ارقىلى ۇلكەن بەلەستەرگە قادام جاسايسىزدار. ارالارىڭىزدان الەم، وليمپيادا چەمپيوندارى شىعا بەرسىن! بارشاڭىزعا ءادىل باسەكە، ساتتىلىك جانە جارقىن جەڭىستەر تىلەيمىن! – دەدى نۇرالحان كوشەروۆ.
VI جاستار سپورت ويىندارى ەلىمىزدىڭ بارلىق وڭىرلەرىندە وتەدى. ونىڭ ىشىندە تۇركىستاندا باسكەتبولدان، بايداركادا جانە كانوەدە ەسۋ سپورت تۇرلەرى بويىنشا ۇيىمداستىرىلادى.
ايتا كەتەيىك، بيىلعى قازاقستان رەسپۋبليكاسىنىڭ VI جاستار سپورت ويىندارى قر دەنە شىنىقتىرۋ مەن سپورتتى دامىتۋدىڭ 2023-2029 جىلدارعا ارنالعان تۇجىرىمداماسىن ىسكە اسىرۋ، ۇلتتىق قۇراما كوماندانى جاساقتاۋ جانە حالىقارالىق جارىستارعا، ونىڭ ىشىندە 2025 جىلى باحرەيندە وتەتىن جاستار اراسىنداعى جازعى ازيا ويىندارىنا دايىندىق اياسىندا وتكىزىلۋدە.
