بۇگىن، 12 ءساۋىر، كورنەكتى عالىم، قازاقستاننان شىققان تۇڭعىش اكادەميك قانىش يمانتايۇلى ساتباەۆتىڭ تۋعانىنا 126 جىل تولدى. وسىعان وراي، ەلىمىزدىڭ ءار وڭىرىندە عالىمنىڭ ەسكەرتكىشىنە گۇل شوقتارىن قويۋ راسىمدەرى ءوتىپ، ونىڭ عىلىم مەن ءبىلىم سالاسىنا قوسقان ۇلەسى ەسكە الىندى.
قانىش ساتباەۆ 1899 جىلى 12 ساۋىردە قازىرگى پاۆلودار وبلىسىنىڭ باياناۋىل اۋدانىندا دۇنيەگە كەلگەن. شىن ەسىمى – عابدۋلعاني. اناسى ونى ەركەلەتىپ “عانيىم”، “عانىشىم” دەپ اتاعان، كەيىن بۇل ەسىم “قانىش” بولىپ كەتكەن.
بولاشاق عالىم ءبىلىم جولىن اۋىل مولداسىنان باستاپ، پاۆلودارداعى ورىس-قازاق ۋچيليششەسىندە، سەمەي مۇعالىمدەر سەمينارياسىندا جالعاستىردى. 1926 جىلى تومسك تەحنولوگيا ينستيتۋتىنىڭ تاۋ-كەن فاكۋلتەتىن ءبىتىرىپ، ينجەنەر-گەولوگ ماماندىعىن الدى.
قانىش ساتباەۆ جەزقازعان مىس كەن ورنىن زەرتتەپ، ونىڭ الەمدەگى ءىرى كەن ورىندارىنىڭ ءبىرى ەكەنىن دالەلدەدى. ول قازاقستان عىلىم اكادەمياسىنىڭ نەگىزىن قالاپ، ونىڭ تۇڭعىش پرەزيدەنتى بولدى. عالىمنىڭ ەڭبەكتەرى قازاقستاننىڭ مينەرالدىق رەسۋرستارىن زەرتتەۋگە جانە گەولوگيا عىلىمىنىڭ دامۋىنا زور ۇلەس قوستى.
قانىش يمانتايۇلى 1964 جىلى 31 قاڭتاردا ماسكەۋ قالاسىندا قايتىس بولدى. بۇگىندە ونىڭ ەسىمىمەن اتالاتىن قالا، ۋنيۆەرسيتەت، كوشەلەر جانە كوپتەگەن ءبىلىم بەرۋ مەكەمەلەرى بار.
