قوسشى قالاسىندا بالاباقشاعا بۇلدىرشىندەردى اپارا جاتقان شاعىن اۆتوبۋس جول اپاتىنا ۇشىراپ، جەتى بالا اۋرۋحاناعا جەتكىزىلدى، دەپ حابارلايدى "ادىرنا" ۇلتتىق پورتالى.
اقمولا وبلىستىق پوليتسيا دەپارتامەنتىنىڭ مالىمەتىنشە، جول-كولىك وقيعاسى 9 ءساۋىر كۇنى تاڭعى ساعات 07:00 شاماسىندا "ورمان القابى" تۇرعىن ءۇي كەشەنى ماڭىندا بولعان.
"الدىن الا مالىمەت بويىنشا، Iveco ماركالى مارشرۋتتىق اۆتوبۋس پەن Toyota ماركالى شاعىن اۆتوبۋستىڭ سوقتىعىسۋى ءبىر دۇكەننىڭ ماڭىندا ورىن العان. سوقتىعىسۋدان كەيىن Toyota شاعىن اۆتوبۋسى ينەرتسيامەن ايالداماعا سوعىلعان. اۆتوبۋستا بالاباقشاعا بارا جاتقان 10 بالا بولعان. جەتەۋى استانا قالالىق اۋرۋحاناسىنا جەتكىزىلدى", – دەپ حابارلادى پوليتسيا وكىلدەرى.
قازىر جول اپاتىنا كىنالى جۇرگىزۋشى مەن وقيعانىڭ ناقتى ءمان-جايى انىقتالۋدا.
