الماتى قالاسىنداعى حايۋاناتتار باعىندا جۇمىس ىستەگەن ەسەپشى-كاسسير 32 ميلليون تەڭگەدەن استام قارجىنى يەمدەندى دەگەن كۇدىكپەن قاماۋعا الىندى. بۇل تۋرالى مەدەۋ اۋداندىق پروكۋراتۋراسى مالىمدەدى، دەپ حابارلايدى "ادىرنا" ۇلتتىق پورتالى.
تەرگەۋ ماتەريالدارىنا سايكەس، ازاماتشا ن. 2015 جىلدىڭ جەلتوقسان ايىنان باستاپ 2016 جىلدىڭ قازان ايىنا دەيىن كورسەتىلگەن قىزمەتتەر ءۇشىن ساتىلعان بيلەتتەر تۋرالى مالىمەتتەردى كومپيۋتەردەن ءوشىرىپ، تۇسكەن قاراجاتتى قالتاسىنا باسىپ وتىرعان. جىمقىرىلعان سوما 32 ميلليون 390 مىڭ تەڭگەدەن اسقان.
"16 تامىزدا الماتى قالاسى مەدەۋ اۋدانى №2 سوتىنىڭ سانكتسياسىمەن "الماتى زوولوگيالىق باعىنا" تيەسىلى اسا ءىرى كولەمدەگى قارجىنى جىمقىرىپ، يەمدەندى دەگەن كۇدىككە ىلىنگەن ازاماتشا ن-عا قاتىستى قاماۋعا الۋ بۇلتارتپاۋ شاراسى قولدانىلدى", – دەلىنگەن پروكۋراتۋرا حابارلاماسىندا.
قازىرگى ۋاقىتتا وعان قر قىلمىستىق كودەكسىنىڭ 189-بابى 4-بولىگى 2-تارماعى – “سەنىپ تاپسىرىلعان بوتەن مۇلىكتى اسا ءىرى مولشەردە يەمدەنۋ نەمەسە ىسىراپ ەتۋ” جانە 241-بابى – “بۋحگالتەرلىك ەسەپ پەن قارجىلىق ەسەپتىلىك تۋرالى زاڭناماسىن بۇزۋ” باپتارى بويىنشا قىلمىستىق ءىس قوزعالىپ، تەرگەۋ امالدارى جۇرگىزىلىپ جاتىر.
