باتىس قازاقستان وبلىسىنىڭ اۋماعىنا تاعى ءبىر ۇشقىشسىز ۇشۋ اپپاراتى قۇلادى، دەپ حابارلايدى "ادىرنا" ۇلتتىق پورتالى «ۋرالسكايا نەدەليا» باسىلىمىنا سىلتەپ.
18 ناۋرىز كۇنى ساعات 17:35-تە تاسقالا اۋدانى پوليتسيا بولىمىنە اتامەكەن اۋىلىنىڭ تۇرعىندارىنان بەلگىسىز نىساننىڭ تابىلعانى تۋرالى حابارلاما تۇسكەن. بولجام بويىنشا، ول قۇلاعان ۇشقىشسىز ۇشۋ اپپاراتى بولۋى مۇمكىن.
نىساننىڭ ۇزىندىعى – 300 سم. وقيعا ورنىنا تاسقالا اۋداندىق پوليتسيا ءبولىمىنىڭ قىزمەتكەرلەرى اتتانعان.
ۇشقىشسىز اپپاراتتىڭ قۇلاعان جەرىنە ورال قالاسىنان پوليتسيا دەپارتامەنتىنىڭ ساپەرلەرى دە جىبەرىلگەنى اتاپ ءوتىلدى.
«كورشىلەس رەسەيدىڭ ساراتوۆ وبلىسى اۋماعىندا ۋكراينالىق ۇشقىشسىز اپپاراتتار اسكەري اۋەجايدى جانە جانارماي ساقتاۋ قويمالارىن ۇنەمى نىساناعا الىپ، اۋقىمدى قيراندىلارعا اكەلۋدە»، – دەلىنگەن حابارلامادا.
ەسكە سالا كەتەيىك، بۇعان دەيىن باتىس قازاقستان وبلىسى ۇيالى اۋىلىنان دا ۇشقىشسىز ۇشۋ اپپاراتى تابىلعانىن جازعان ەدىك.
