ءبىر ايدان استام ۋاقىتقا سوزىلاتىن اۋقىمدى فەستيۆال اباي وبلىسىنىڭ تۇرعىندارىن كوكتەمگى مەرەكەلەردىڭ شاتتىق كوڭىل-كۇيىمەن بىرىكتىرەدى.
14 ناۋرىزدان باستاپ اباي وبلىسىندا ناۋرىز مەيرامىنا ارنالعان ءىرى مادەني جوبا – «ەلدەن سالەم!» فەستيۆالى باستاۋ الدى. فەستيۆال ءداستۇردى، ونەردى، حالىق شىعارماشىلىعىن جانە ىسكەرلىك باستامالاردى توعىستىرىپ، بىرلىك پەن ۇلتتىق جاڭعىرۋدىڭ ەرەكشە اتموسفەراسىن قالىپتاستىرادى.
جوبانىڭ ءساتتى باستاماسى – ناۋرىز مەيرامىنىڭ باستاۋى سانالاتىن كورىسۋ كۇنى مەرەكەسىمەن تۇسپا-تۇس كەلدى. الداعى بىرنەشە اپتا بويى مادەني باعدارلاما وبلىستىڭ بارلىق اۋداندارى مەن قالالارىن قامتىپ، شىعارماشىلىق، تاجىريبە الماسۋ جانە دوستىق قارىم-قاتىناس الاڭىنا اينالادى.
«وبلىسىمىزدا مۇنداي شارا العاش رەت وتۋدە. باستى ماقسات – اۋداندار اراسىنداعى ىنتىماقتاستىقتى نىعايتۋ جانە تاجىريبە الماسۋ»، – دەيدى اباي وبلىسىنىڭ مادەنيەت، تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى تولقىن بەرىكبەكوۆا.
بۇگىن فەستيۆال اياسىندا جارما اۋدانىندا بەسقاراعاي اۋدانىنىڭ مادەنيەت كۇنى باستاۋ الدى. بەسقاراعايلىق ونەرپازداردى داستۇرگە ساي كورىسۋ راسىمىمەن قارسى الدى.
ال كوكپەكتى اۋدانىنان كەلگەن جوبا قاتىسۋشىلارى وزدەرىنىڭ ونەرى مەن جەتىستىكتەرىن كورسەتۋ ءۇشىن بورودۋليحا اۋدانىنا اتتاندى.
شىعارماشىلىق ۇجىمداردىڭ مەرەكەلىك باعدارلاماسى، اۋىلشارۋاشىلىق جارمەڭكەلەرى، بيزنەس جانە مەملەكەتتىك قۇرىلىم وكىلدەرى اراسىنداعى ىسكەرلىك كەزدەسۋلەر – مۇنىڭ ءبارىن ءبىر جوبادا اۆتورلار ءساتتى ۇيلەستىرىپ، كۇردەلى ءارى قىزىقتى مىندەتتى ءساتتى ورىندادى.
فەستيۆالدىڭ قورىتىندىسى بويىنشا اباي قۇنانبايۇلىنىڭ 180 جىلدىعىنا ارنالعان اۋقىمدى گالا-كونتسەرت وتەدى.«ەلدەن سالەم!» فەستيۆالى اباي وبلىسى تۇرعىندارى مەن بارشا قازاقستاندىقتار ءۇشىن بيىلعى جىلدىڭ ەڭ ەستە قالارلىق وقيعالارىنىڭ ءبىرى بولاتىنى ءسوزسىز.
