الماتى وبلىسىندا جاس انا 6- قاباتتان قۇلاپ، مەرت بولدى، دەپ حابارلايدى “ادىرنا” ۇلتتىق پورتالى Todayinfo سايتىنا سىلتەپ.
مارقۇمنىڭ اكە-شەشەسى سوت ساراپتاماسىنىڭ شەشىمىمەن كەلىسپەي، «مورگتەن» قىزدارىن الماي وتىر. قايتىس بولعان اجار تاۋەكەلقىزى 2004 جىلى تۋعان. ەكى جىل بۇرىن مەكتەپتە وزىمەن بىرگە وقىعان جىگىتكە تۇرمىسقا شىققان. الايدا تۇرمىس قۇرعالى تاياقتان كوز اشپاعان.
«قىزىمنىڭ كورگەن كۇنى كۇن بولمادى. ارتىندا ءبىر جاستاعى ۇلى جەتىم قالدى. تالاي رەت تاياق جەدى. كۇيەۋى اراق ىشەدى، شەشەسىمەن قوسىلىپ اراق ىشەدى. ەكەۋى ەكى جاقتاپ قىزىما كۇن كورسەتپەدى. ءبىر رەت تالدىرىپ ۇرىپ تاستاپتى. ۇنەمى قىلقىندىرىپ ۇراتىن، وعان مىنا سۋرەتتەر دالەل، قىزىم جىبەرگەن. وسى جولى مەرەكە قارساڭىندا تاعى قانداي لاڭ سالعانى بەلگىسىز، اقىرى قىزىمنىڭ تۇبىنە جەتتى. بۇعان دەيىن تاعى ءبىر رەت ۇرعاندا قىزىم ەسىنەن تانىپ قالعان. كۇيەۋىنىڭ اتى نادىربەك. ەكەۋى ءبىراز ۋاقىت اقتاۋدا تۇردى، سول كەزدە دە وسىلاي ۇرعان»، — دەدى مارقۇمنىڭ اناسى گۇلجان جاقىپ.
جابىرلەنۋشى گۇلجان مەكتەپتە مۇعالىم، قىزىنىڭ كۇيەۋى تاراپىنان ءجيى سوققىعا جىعىلعانىن ايتادى. قىزىن بىرنەشە رەت ۇيىنە دە اكەلىپ العان كەزدەرى بولىپتى. الايدا كۇيەۋ بالاسى ەكى-ءۇش ايدان سوڭ كەشىرىم سۇراپ، قىزىن قايتادان الىپ كەتكەن.
«وقيعا كەشە تۇستەن كەيىن ساعات 15.00-16.00 ارالىعىندا بولعان. قىزىم وسى جىگىتكە تيەم دەپ كۇش بەرمەگەن سوڭ امالسىز كونگەن ەدىك. بارعالى بىرنەشە رەت تاياق جەدى. قىزىم وزدىگىنەن ولە قوياتىن ادام ەمەس. مىنالار تاعى ۇرىپ، بالكوننان لاقتىرىپ جىبەردى دەگەن كۇدىگىم دە بار. جايدان جاي سۋيتسيد جاسامايدى قىزىم، ابدەن قورلاپ تۇڭىلدىرگەن. سوت ساراپتاماسى بىزگە قىزىمىزدىڭ دەنەسىن بەرمەي قويىپ ەدى، قارسى تاراپ ادۆوكات جالداپ، قىزىمدى «ءوزى ءولدى» قىلىپ قاعاز جازعىزىپ الىپتى. كەشە قىزىمنىڭ ەنەسى دە، كۇيەۋ بالا دا ىشىمدىك ىشكەن ەكەن. ەندى بۇگىن اۋرۋحاناداعىلار قىزدارىڭنىڭ دەنەسىن جىلدام الىپ كەتىڭدەر دەپ جاتىر. ءبىز ولاردىڭ ەشقانداي سوققى الماعان، ءوزى ولگەن دەگەن قورىتىندىسىمەن كەلىسپەيمىز. قىزىمدى كۇيەۋى ۇنەمى ۇرعان. ونى مەنەن جاسىرىپ ايتپاي كەلگەن. كۇيەۋ بالا شەشەسىمەن بىرگە ۇيلەرگە رەمونت جاسايدى، قاراقالپاقستاننان كوشىپ كەلگەندەر»، — دەدى مارقۇمنىڭ اكەسى تاۋەكەل جەكەبايۇلى.
وقيعانى الماتى وبلىستىق پوليتسيا دەپارتامەنتى راستادى. قازىرگى ۋاقىتتا تەرگەۋ امالدارى ءجۇرىپ جاتىر.
«پوليتسيا بۇل فاكتى بويىنشا قىلمىستىق ءىس قوزعادى. وقيعانىڭ سەبەپتەرى مەن ءمان-جايىن انىقتاۋ ءۇشىن قاجەتتى تەرگەۋ ارەكەتتەرى جۇرگىزىلۋدە. تەرگەۋ مۇددەسىندەگى باسقا اقپارات جاريا ەتىلمەيدى»، — دەپ حابارلادى وبلىستىق پد ءباسپاسوز قىزمەتى.
قىزدىڭ اتا-اناسى ءبىر كۇن بۇرىن قىزدارى ەنەسىنىڭ دوستارىن كۇتۋ ءۇشىن اسىعىپ كەتىپ قالعانىن ايتادى.
«قىزىم مەرەكە كۇنى اپاسىن قۇتتىقتاپ كەلگەن، كۇيەۋى كەلگەن سوڭ اسىعىپ كەتىپ قالعان. بىزگە ەنەسىنىڭ دوستارى ۇيگە كەلەتىنىن، ولاردى كۇتۋ ءۇشىن داستارحان جاساپ، دايىندالاتىنىن ايتقان. ياعني، تاعىدا ىشىمدىك ىشىلگەن، قانشا ادامدى كۇتكەنىن بىلمەيمىز. قىزىم ءوزى ىشىمدىككە جوق، جاس بالاسى بار. ەرتەڭىندە تۇسكەن كەيىن قىزىمنىڭ قايتىس بولعانىن ەستىدىك. ەنەسى اجىراسقان، ىشىمدىككە جاقىن، قىزىما نە ىستەگەندەرى بەلگىسىز. كۇيەۋى وسى جولى ۇرعان بولۋى مۇمكىن»، — دەدى مارقۇمنىڭ اناسى.
