Túrkistan oblysynda 19 jastaǵy Jasulan Ábdimanaptyń óli denesi tabyldy. Ol 20 aqpanda monshaǵa ketip, qaıta oralmaǵan. Eki kúnnen keıin onyń denesi dalada tabyldy. Marqumnyń jaqyndarynyń aıtýynsha, ony óz aýyldastary qınap óltirgen, dep habarlaıdy "Adyrna" ulttyq portaly.
Marqumnyń anasy Raıhan Jamalovanyń aıtýynsha, uly aýyldastaryna senip, olar úshin birneshe nesıe rásimdegen. Jasulan nesıeni tóleý máselesin qozǵaǵan kezde qaryz alǵandar ony aıdalaǵa aparyp, 14 jerinen pyshaqtap óltirgen.
"Meniń balam olardyń anasy aýyrǵanyna senip, kómek qolyn sozǵan. Biraq olar aldap, birneshe ret nesıe aldyrtypty. Endi qaıtarý ýaqyty kelgende, ony osylaısha azaptap óltirdi", – deıdi anasy.
Qazir bul qylmysqa qatysty tergeý amaldary júrip jatyr. QR IIM Ońtústik óńirlik áskerı-tergeý basqarmasynyń málimetinshe, 19 jastaǵy jigittiń ólimine kúdikti retinde áskerı qyzmetker ustalyp, sottyń sankııasymen eki aıǵa qamaýǵa alyndy.
Marqumnyń otbasy barlyq kinálilerdiń jaýapqa tartylýyn talap etýde.
