بۇگىن شىمكەنتتەگى «دوستىق ۇيىندە» شىمكەنت قالاسىنىڭ اكىمى، قالالىق قازاقستان حالقى اسسامبلەياسىنىڭ توراعاسى عابيت سىزدىقبەكوۆتىڭ قاتىسۋىمەن 1 ناۋرىز – العىس ايتۋ كۇنى جانە قازاقستان حالقى اسسامبلەياسىنىڭ 30 جىلدىعىنا ارنالعان «العىس ايتۋ – ادامگەرشىلىكتىڭ بەلگىسى» تاقىرىبىنداعى مەرەكەلىك ءىس-شارا ءوتتى.
ءىس-شارا اياسىندا شىمكەنت قالاسىنىڭ الەۋمەتتىك-ەكونوميكالىق دامۋىنا ۇلەس قوسىپ جۇرگەن ەتنوس كاسىپكەرلەرى وندىرەتىن ونىمدەردىڭ كورمەسى ۇيىمداستىرىلدى. قالالىق اسسامبلەيا مۇشەلەرى مەن ەتنومادەني بىرلەستىكتەردىڭ توراعالارى «قازاق ەلىنە مىڭ العىس!» مونۋمەنتىنە گۇل قويىپ، قحا-نىڭ 30 جىلدىعىنا ارنالعان «بىرلىك پەن كەلىسىم جولىنداعى 30 جىل» ەسكەرتكىش تاقتاسىن اشتى. ال «العىس» كەرۋەنىن ءسان-سالتاناتپەن كۇتىپ الۋ ءراسىمى كوپشىلىككە ەرەكشە اسەر قالدىردى.
«دوستىق ءۇيى» عيماراتىندا قالالىق ەتنومادەني بىرلەستىكتەردىڭ تاريحي-تانىمدىق كورمەسى جۇرتشىلىق نازارىنا ۇسىنىلىپ، حالقىمىزدىڭ مادەني-تاريحي بايلىعى مەن ەتنوستار تاريحىنان سىر شەرتەتىن ەسكپوناتتار تانىستىرىلدى.
قالا اكىمى عابيت سىزدىقبەكوۆ سالتاناتتى ءىس-شاراعا قاتىسۋشىلار الدىندا مەملەكەت باسشىسى، قازاقستان حالقى اسسامبلەياسىنىڭ توراعاسى قاسىم-جومارت كەمەلۇلى توقاەۆتىڭ قۇتتىقتاۋىن وقىپ بەردى.
– اسسامبلەيا جىلدار بويى حالقىمىزدىڭ ىرىستى ىنتىماعىن نىعايتۋعا، قوعامداعى ءوزارا تۇسىنىستىك پەن كەلىسىمدى ساقتاۋعا ولشەۋسىز ۇلەس قوسىپ كەلەدى. وسى ۇيىمنىڭ بەلسەندى قىزمەتى ارقىلى ەلىمىزدەگى بارلىق ەتنوستىڭ ءتىلىن، مادەنيەتى مەن سالت-ءداستۇرىن ۇيلەسىمدى دامىتۋعا، سونداي-اق قازاق ءتىلىنىڭ ەتنوسارالىق قاتىناس ءتىلى رەتىندەگى مارتەبەسىن كوتەرۋگە جول اشىلدى.
پارلامەنتتە وكىلدەرى بار قازاقستان حالقى اسسامبلەياسى مەملەكەت پەن قوعام اراسىندا اشىق ديالوگ ورناتقان ءتيىمدى قۇرىلىمعا اينالدى. ۇيىم مۇشەلەرى ماڭىزدى باستامالار كوتەرىپ، ەلگە قاجەتتى جوبالاردى جۇزەگە اسىرىپ جاتىر، قازاقستانداعى اۋقىمدى وزگەرىستەرگە دە بارىنشا اتسالىسىپ كەلەدى، – دەپ قحا توراعاسىنىڭ قۇتتىقتاۋىن جەتكىزگەن قالا اكىمى جۇرتشىلىقتى 1 ناۋرىز – العىس ايتۋ كۇنىمەن جانە اسسامبلەيانىڭ 30 جىلدىعىمەن قۇتتىقتادى.
ايتا كەتەيىك، 1 ناۋرىزدا قۇرىلعانىنا 30 جىل تولعان قازاقستان حالقى اسسامبلەياسى بۇگىندە قوعامدىق كەلىسىم مەن جالپىۇلتتىق بىرلىكتى بەكەمدەۋ، ەتنوسارالىق كەلىسىمدى ساقتاۋ جانە قازاقستاندىق ءپاتريوتيزمدى دارىپتەۋ سىندى ەتنوساياسات اياسىنداعى ماقسات-مىندەتتەردى ابىرويمەن اتقارىپ كەلەدى.
بۇگىندە قالالىق قحا جانىنداعى 16 ەتنومادەني بىرلەستىك پەن 7 قوعامدىق قۇرىلىم بەرەكەلى بىرلىك جولىن كوزدەگەن باستامالار مەن جوبالاردى قولداپ، قۋاتتاۋدان شەت قالعان ەمەس.
تۇعىرلى تاتۋلىقتى تۋ ەتكەن سانالۋان شىمكەنتتىك ەتنوس وكىلدەرى تاريحى تەرەڭ شىمقالانىڭ قوعامدىق-ساياسي، الەۋمەتتىك-ەكونوميكالىق ومىرىنە ارالاسىپ، ەلىمىزدەگى ءۇشىنشى مەگاپوليستىڭ ءوسىپ-وركەندەۋىنە لايىقتى ۇلەس قوسۋدا.
