جۋرناليست ميحيال كوزاچكوۆ جەلىدەگى پاراقشاسىندا حالىقارالىق ىزدەۋدە جۇرگەن اقتاۋ قالاسى اكىمىنىڭ بۇرىنعى ورىنباسارى تيمۋر سادۋاقاسوۆ وزبەكستاندا ۇستالعانىن جازدى، دەپ حابارلايدى “ادىرنا” ۇلتتىق پورتالى.
اقپارات بويىنشا، ەكس-شەنەۋنىك قازاقستاننان زاڭسىز شىعىپ، الدىمەن قىرعىزستانعا وتكەن. سودان كەيىن وزبەكستان اۋماعىنا دا زاڭسىز جولمەن كىرگەن. ءسويتىپ جەرگىلىكتى شەكاراشىلاردىڭ قولىنا تۇسكەن. ەندى وعان 5 جىلدان 10 جىلعا دەيىن باس بوستاندىعىنان ايىرۋ جازاسى تاعايىندالۋى مۇمكىن. سەبەبى وزبەكستان رەسپۋبليكاسىنىڭ شەكاراسىن الدىن الا كەلىسىلگەن توپپەن زاڭسىز كەسىپ وتكەندەرگە وسىنداي جازا قاراستىرىلعان.
ال قازاقستاندا تيمۋر سادۋاقاسوۆ "تيولاين" جشس باسشىلىعىنىڭ قىزمەتىنە قاتىستى جەمقورلىق قىلمىستارى بويىنشا كۇدىككە ىلىنگەن. بۇل كومپانيا سولتۇستىك قازاقستان وبلىسىنداعى "وبۋحوۆسكوە" سيرەك كەزدەسەتىن مەتالدار كەن ورنىن يگەرۋمەن اينالىسادى.
اتالعان كاسىپورىننىڭ اكتسيونەرلەرىنىڭ ءبىرى – ۆيكتور دولگالەۆ تە ءبىراز ۋاقىتتان بەرى تەرگەۋ نىسانىندا. ونى زاڭسىز كاسىپكەرلىكپەن اينالىستى جانە جەر قويناۋىن ءوز بەتىنشە پايدالاندى دەپ ايىپتاعان. العاشىندا ونى قازىلار القاسى اقتاپ شىققانىمەن، كەيىن بۇل شەشىمنىڭ كۇشى جويىلىپ، ءىس باسقا ايماقتا قايتا قاراۋعا جىبەرىلدى.
تەرگەۋ بولجامىنشا دولگالەۆ ءاردايىم سەرىكتەستەرىمەن زاڭ اياسىندا جۇمىس ىستەي بەرمەگەن. ول كەيبىر ماسەلەلەردى شەشۋ ءۇشىن شەنەۋنىك سادۋاقاسوۆ ارقىلى قۇقىق قورعاۋ ورگاندارىنىڭ كومەگىنە جۇگىنگەن. وسى سەبەپتى سادۋاقاسوۆقا "الاياقتىق" جانە "پارا بەرۋگە يتەرمەلەۋ" باپتارى بويىنشا ايىپ تاعىلعان. وسىلايشا اقتاۋ اكىمىنىڭ ەكس-ورىنباسارى قاشۋعا ءماجبۇر بولدى، ال بۇل ارەكەتىمەن ول تەك قازاقستاننىڭ عانا ەمەس، كورشى ەلدىڭ دە زاڭناماسىن بۇزدى. ەندى تيمۋر سادۋاقاسوۆ بىردەن ەكى ەلدە تۇرمەگە قامالۋى مۇمكىن.
ايتا كەتسەك، سادۋاقاسوۆ 2019 جىلدىڭ اقپان ايىنان بەرى اقتاۋ قالاسى اكىمىنىڭ ورىنباسارى قىزمەتىن اتقارعان.
ەسكە سالايىق، بۇعان دەيىن سولتۇستىك قازاقستان وبلىسى بويىنشا ەكونوميكالىق تەرگەۋ دەپارتامەنتى اقتاۋ قالاسى اكىمىنىڭ بۇرىنعى ورىنباسارى تيمۋر سادۋاقاسوۆقا ىزدەۋ جاريالادى جانە تاپقان ادامعا سىياقى بەرىلەتىنىن حابارلادىق.
