اقش پرەزيدەنتى دونالد ترامپ حالىقارالىق قىلمىستىق سوتقا (حقس) سانكتسيالار ەنگىزۋ تۋرالى جارلىققا قول قويدى. بۇل تۋرالى Reuters جازدى، دەپ حابارلايدى “ادىرنا” ۇلتتىق پورتالى.
ترامپ اتالعان ۇيىمدى اقش پەن ونىڭ نەگىزگى وداقتاستارىن، اسىرەسە ءيزرايلدى زاڭسىز قۋدالاۋمەن ايىپتادى.
جارلىق بويىنشا، اقش ازاماتتارى مەن ولاردىڭ وداقتاستارىنا قاتىستى تەرگەۋلەر جۇرگىزۋگە قاتىسقان ادامدار مەن ولاردىڭ وتباسى مۇشەلەرىنە قارجىلىق جانە ۆيزالىق سانكتسيالار سالىنادى.
بۇل شەشىم اقش سەناتىنداعى دەموكراتتاردىڭ وتكەن اپتادا حقس-قا سانكتسيا سالۋ تۋرالى رەسپۋبليكاشىلداردىڭ ۇسىنىسىن بۇعاتتاۋىنان كەيىن قابىلداندى. رەسپۋبليكاشىلار بۇل سانكتسيالاردى يزرايل پرەمەر-ءمينيسترى بينيامين نەتانياحۋ مەن بۇرىنعى قورعانىس ءمينيسترى يواۆ گالانتقا وردەر شىعارۋعا جاۋاپ رەتىندە ەنگىزبەك بولعان. نەتانياحۋ قازىر رەسمي ساپارمەن ۆاشينگتوندا ءجۇر.
ترامپتىڭ جارلىعىندا «حقس ءوز وكىلەتتىگىن اسىرا پايدالانىپ، يزرايل پرەمەر-ءمينيسترى بينيامين نەتانياحۋ مەن بۇرىنعى قورعانىس ءمينيسترى يواۆ گالانتقا نەگىزسىز وردەر بەردى» دەپ جازىلعان.
سونداي-اق، اقش پەن يزرايل «سوعىس زاڭدارىن قاتاڭ ساقتايتىن دەموكراتيالىق ەلدەر» ەكەنى ايتىلعان.
Reuters اگەنتتىگىنىڭ جازۋىنشا، حقس اقش-تىڭ مۇمكىن سانكتسيالارىنا دايىندالىپ، قىزمەتكەرلەرىنە ءۇش ايلىق جالاقىنى الدىن الا تولەگەن.
ال ۇيىم اقش سانكتسيالارىن «قۇقىق ۇستەمدىگىنە ارالاسۋدىڭ جول بەرىلمەيتىن ارەكەتى» دەپ باعالادى.
