ءۇندىستاننىڭ اندحرا-پرادەش شتاتىنداعى شريحاريكوتا ارالىندا ورنالاسقان ساتيش دحاۆان اتىنداعى عارىش ورتالىعىنان 100-ءشى عارىشتىق ۇشىرۋ ءساتتى ءوتتى، دەپ حابارلايدى "ادىرنا" ۇلتتىق پورتالى Dzen.ru-عا سىلتەپ.
ءۇندىستاننىڭ عارىشتىق زەرتتەۋلەر ۇيىمى (ISRO) GSLV MkII F15 زىمىران تاسىعىشىن ۇشىرىپ، ونى جەر وربيتاسىنا شىعاردى.
بۇل تاريحي ۇشىرۋ ءۇندىستاننىڭ عارىشتىق زەرتتەۋلەر سالاسىنداعى ۇلكەن جەتىستىكتەرىنىڭ ءبىرى بولىپ سانالادى. شريحاريكوتا عارىش ايلاعىنان العاشقى زىمىران 1979 جىلدىڭ تامىز ايىندا ۇشىرىلعان ەدى. سودان بەرى ەل عارىشتىق تەحنولوگيالاردى دامىتۋدىڭ ۇزاق جولىنان ءوتىپ، الەمدىك عارىش دەرجاۆالارىنىڭ بىرىنە اينالدى.
ءۇندىستان تەك سپۋتنيكتەردى ۇشىرۋمەن شەكتەلمەي، عارىشتى تەرەڭ زەرتتەۋگە باعىتتالعان ءىرى جوبالاردى قولعا الۋدا. 2025 جىلدىڭ تامىز ايىندا ءۇندىستان بيلىگى لاداكح اۋماعىندا اي مەن مارستى زەرتتەۋگە ارنالعان جاڭا جەرۇستى ستانتسياسىن سالۋ جوسپارىن جاريالادى.
سونىمەن قاتار، ISRO باسشىسى شريدحار پانيكەر شىلدە ايىندا ءۇندىستاننىڭ العاشقى ادامدى ايعا جىبەرۋگە ارنالعان زىمىرانىن جاساۋدى باستاعانىن مالىمدەدى.
