جۋرناليست ۆاديم بورەيكو الەۋمەتتىك جەلىدە تاراعان جالعان اقپاراتقا بايلانىستى پوليتسياعا شاعىمداندى، دەپ حابارلايدى "ادىرنا" ۇلتتىق پورتالى "ازاتتىق راديوسىنا" سىلتەپ.
تانىمال جۋرناليست، "گيپەربورەي" YouTube-ارناسىنىڭ اۆتورى ۆاديم بورەيكو ءوزى تۋرالى جالعان اقپارات تاراتقانداردى جاۋاپقا تارتۋدى تالاپ ەتىپ، بوستاندىق اۋداندىق پوليتسيا باسقارماسىنا شاعىم ءتۇسىردى.
الەۋمەتتىك جەلىدە "بورەيكو ايەلىن ۇرىپ-سوعىپ، قوعامدىق ءتارتىپتى بۇزدى" دەگەن فەيك اقپارات تاراعان. الايدا الماتى قالالىق پوليتسياسى بۇل اقپاراتتى جوققا شىعارىپ، ونىڭ شىندىققا سايكەس كەلمەيتىنىن راستادى.
"جۋرناليست ۆاديم بورەيكونىڭ ۇستالعانى تۋرالى اقپارات جالعان. ازاماتتاردى رەسمي دەرەككوزدەرگە سۇيەنۋگە جانە جالعان اقپارات تاراتپاۋعا شاقىرامىز", – دەپ حابارلادى پوليتسيا دەپارتامەنتى.
بورەيكو بۇل فەيك مالىمەت Facebook-تا Alzhan Ismagulov پەن رومان ۋلانوۆ ەسىمدى قولدانۋشىلاردىڭ پاراقشاسىندا جاريالانعانىن ايتتى. ول Telegram-ارناسىندا ۋلانوۆ جاريالاعان "قۇجاتتىڭ" فەيك ەكەنىن جانە وندا جىل مەن باسقا دا مالىمەتتەردىڭ دۇرىس جازىلماعانىن اتاپ ءوتتى.
بورەيكو پوليتسياعا شاعىمىن تاپسىرعان كەزدە فەيك جازبالاردىڭ سكرينشوتتارى مەن ۆيدەوجازبالارىن قوسىمشا دالەل رەتىندە ۇسىنعان. ول جازبا اۆتورلارىن "جالعان اقپارات تاراتۋ" بابى بويىنشا جاۋاپقا تارتۋدى تالاپ ەتتى.
وسىدان كەيىن ۋلانوۆ پەن Ismagulov ءوز جازبالارىنا تۇسىنىكتەمە بەردى. ۋلانوۆ بورەيكونى كوممەنتاري ءۇشىن بەلگىلەگەنىن ايتسا، Ismagulov "اقپاراتتى تاۋەلسىز ەكى دەرەككوزدەن العانىن" جازدى.
ايتا كەتەيىك، ۆاديم بورەيكوعا العاش رەت قىسىم جاسالۋى ەمەس. 2023 جىلى بەلگىسىز بىرەۋلەر ونىڭ پاتەر ەسىگىن كوبىكپەن جاۋىپ، بەينەوپەراتور رومان ەگوروۆتىڭ كولىكتەرىن ورتەپ كەتكەن.