الماتىدا كورۋ جانە ەستۋ قابىلەتى بۇزىلعان ادامدارعا جەتى كىتاپحانا قىزمەت كورسەتەدى، ولاردىڭ اقپاراتقا قول جەتكىزۋى ءۇشىن زاماناۋي جابدىقتارمەن قامتاماسىز ەتىلگەن. الماتى اكىمى ەربولات دوساەۆتىڭ ينكليۋزيۆتى ورتا قۇرۋ جونىندەگى تاپسىرماسى اياسىندا بۇل كىتاپحانالاردا ءماتىندى تاكتيلدى فورماتتا كورسەتەتىن برايل ديسپلەيلەرى، برايل قارپىندە باسىپ شىعارۋعا ارنالعان پرينتەرلەر، ءماتىننىڭ كونتراستىن ۇلكەيتۋگە جانە وزگەرتۋگە ارنالعان قۇرىلعىلار مەن ءماتىندى وقيتىن، ونى داۋىستاپ ويناتاتىن جانە اۋديوفورماتقا اۋداراتىن سكانەرلەر ورناتىلعان.
اۋديوكىتاپتاردى تىڭداۋ ىڭعايلى بولۋ ءۇشىن كىتاپحانالاردا دىبىس ساپاسى جوعارى قۇلاققاپتار دا بار. بۇعان قوسا، بەيىمدەلگەن باعدارلامالىق جاساقتاماسى بار كومپيۋتەرلەر ورناتىلعان، بۇل كورۋ جانە ەستۋ قابىلەتى ناشار ادامدارعا اقپاراتپەن ءتيىمدى جۇمىس ىستەۋگە سەپتىگىن تيگىزەدى.
ەستۋ جانە كورۋ قابىلەتى بۇزىلعان ادامدار مىنا كىتاپحانالارعا بارا الادى: جامبىل اتىنداعى قجك، «Alatau Creative Hub»، چەحوۆ اتىنداعى وقك، قازاقستان جازۋشىلارىنىڭ كىتاپحاناسى، سونداي-اق №4, 14 جانە 45 فيليالدار. بۇل جەرلەردە اقپاراتتىق رەسۋرستاردى پايدالانۋ ىڭعايلى بولۋ ءۇشىن بارلىق جاعداي جاسالعان. باستاما مادەني نىساندارعا تەڭ قولجەتىمدىلىك پەن كەدەرگىسىز ورتا قۇرۋ قاعيداسى اياسىندا قالا اكىمىنىڭ تاپسىرماسىمەن جۇزەگە اسىرىلدى.
ايتا كەتەيىك، بۇل كىتاپحانالاردا كورۋ قابىلەتى ناشار قىزمەتكەرلەر دە جۇمىس ىستەيدى. ولار وقىرماندارعا قۇرال-جابدىقتى ۇيرەنۋگە، قاجەتتى رەسۋرستاردى ىزدەۋگە جانە وقىتۋعا كومەك كورسەتەدى. بۇل جۇمىس ورىندارىن قۇرۋعا جانە قالانىڭ بارلىق تۇرعىنى ءۇشىن مادەنيەت پەن بىلىمگە دەگەن قولجەتىمدىلىكتى ارتتىرۋعا مۇمكىندىك بەرەدى.
قالا اكىمدىگىنىڭ قولداۋىمەن الماتىنى دامىتۋدىڭ جول كارتاسى اياسىندا كىتاپحانا قىزمەتكەرلەرى سەۋلدە تاعىلىمدامادان ءوتىپ، كىتاپحانالىق قىزمەت كورسەتۋدىڭ زاماناۋي ادىستەرىن مەڭگەردى، سالاعا بۇل جاڭاشىلدىق ەنگىزىلە باستادى. بىلتىر ماماندار گەرمانيا مەن شۆەيتساريادا دا تاعىلىمدامادان ءوتتى.
جالپى، الماتى كىتاپحانالارىندا 400-گە جۋىق ادام جۇمىس ىستەيدى. 2023 جىلى قالا اكىمىنىڭ باستاماسىمەن قىزمەتكەرلەردىڭ جالاقىسى 30%-عا ءوستى، 2024 جىلى جالاقى تاعى 25%-عا ۇلعايدى، ال بيىل تاعى 29%-عا كوبەيەدى. ايتا كەتەيىك، قالا كىتاپحانالارىنىڭ 18 جاس مامانى «الماتى جاستارى» باعدارلاماسى بويىنشا باسپانالى بولدى.
قالادا اكىمدىككە قاراستى 28 كىتاپحانا جۇمىس ىستەيدى، ونىڭ 95%-ى جاڭعىرتىلعان. جىل سايىن الماتى كىتاپحانالارىنا كەلۋشىلەردىڭ جالپى سانى 3 ميلليوننان اسادى.
