وڭتۇستىك كورەيا تەرگەۋشىلەرى ۋاقىتشا قىزمەتىنەن شەتتەتىلگەن، بىراق قىزمەتىن جالعاستىرىپ جاتقان ەل پرەزيدەنتى يۋن سوك ءيولدى "بۇلىك جاسادى" دەگەن ايىپپەن قاماۋعا الدى، دەپ حابارلايدى "ادىرنا" ۇلتتىق پورتالى Yonhap اگەنتتىگىنە سىلتەمە جاساپ.
«باسقارما پرەزيدەنت يۋن سوك ءيولدى "بۇلىككە جەتەكشىلىك ەتتى" دەگەن ايىپپەن قاماۋعا الدى»، – دەلىنگەن اگەنتتىك حابارلاماسىندا.
15 قاڭتار كۇنى تاڭەرتەڭ تەرگەۋشىلەر مەملەكەت باسشىسىنىڭ رەزيدەنتسياسىنا كەلىپ، ونى قاماۋعا الماق بولعان. الايدا ولار پرەزيدەنتتىڭ قاۋىپسىزدىك قىزمەتىمەن قاقتىعىسقا تۇسكەن. شامامەن 2,5 ساعات وتكەن سوڭ، باسپالداقتاردى پايدالانىپ، پوليتسيا مەن جوعارى لاۋازىمدى شەنەۋنىكتەرگە قاتىستى سىبايلاس جەمقورلىقتى تەرگەۋ باسقارماسىنىڭ (CIO) قىزمەتكەرلەرى رەزيدەنتسياعا كىرگەن.
وپەراتسياعا 200-گە جۋىق پوليتسەي مەن CIO-نىڭ 40 تەرگەۋشىسى قاتىستى.
كەيىن بەلگىلى بولعانداي، يۋن سوك يول قايعىلى وقيعالاردىڭ الدىن الۋ ءۇشىن تەرگەۋگە ءوزى بارۋ تۋرالى شەشىم قابىلداعان. سونىمەن قاتار، رەزيدەنتسيانى كۇزەتىپ تۇرعان اسكەري بولىمشەلەر تەرگەۋشىلەرگە قاماۋعا الۋ وردەرىن ورىنداۋعا كەدەرگى كەلتىرمەۋگە كەلىسكەن.
وڭتۇستىك كورەيا تەرگەۋشىلەرى 3 قاڭتاردا ۋاقىتشا شەتتەتىلگەن پرەزيدەنتتى قاماۋعا الۋ وردەرىن ورىنداۋعا تىرىسقان بولاتىن. بىراق بەس ساعاتتان استام ۋاقىتقا سوزىلعان پرەزيدەنت كۇزەتىمەن بولعان قاقتىعىستان كەيىن بۇل ارەكەتتى توقتاتۋعا ءماجبۇر بولدى. جوعارى لاۋازىمدى تۇلعالاردىڭ سىبايلاس جەمقورلىعىن تەرگەۋ باسقارماسى وردەر ورىنداۋدان باس تارتۋ سەبەبىن سول جەردە بولعان قىزمەتكەرلەردىڭ قاۋىپسىزدىگىنە تونگەن قاتەرمەن ءتۇسىندىردى.
يۋن سوك يول اسكەري توڭكەرىس جاساپ، ەلدە اسكەري جاعداي جاريالادى جانە پارلامەنتتىڭ توتەنشە جاعدايدى جويۋ ءۇشىن داۋىس بەرۋىنە كەدەرگى جاساۋ ماقساتىندا اسكەر جىبەردى دەپ ايىپتالىپ وتىر.
سوڭعى جىلدارى وڭتۇستىك كورەيا پرەزيدەنتتەرى ءجيى ايىپتالىپ، سوتتالاتىن بولدى.
