قىتايلىق ارحەولوگتەر تسزيانتسزياپو قورىمىنداعى №1 مولاعا (M1) جانە وعان جاپسارلاس ور مەن شۇڭقىرلارعا قازبا جۇمىستارىن جۇرگىزۋ كەزىندە قۇرباندىققا شالىنعان جىلقىلاردىڭ سۇيەگىن جانە ات ابزەلدەرىن تاپتى. بۇل تۋرالى قىتايدىڭ ورتالىق تەلەارناسى جاريالادى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
اقپاراتقا سايكەس، تسزيانتسزياپو قورىمى قىتايدىڭ قۇمىل قالاسىنىڭ نارىنكەر قازاق اۋىلىنىڭ اۋماعىندا جاتىر. ول وسى ايماقتان تابىلعان جانە ب.ز.د. III عاسىر مەن I عاسىر ارالىعىنا ءتان دەپ ۇيعارىلعان ەڭ ۇلكەن، قۇرىلىمى جەتە انىقتالعان جانە ەڭ جاقسى ساقتالعان قورىم سانالادى.
سولتۇستىك-باتىس قىتاي ۋنيۆەرسيتەتى مادەني مۇرالار ينستيتۋتىنىڭ دوتسەنتى سي تۋنيۋاننىڭ ايتۋىنشا، ارحەولوگتار قورىمنىڭ وڭتۇستىك بولىگىندەگى قۇرباندىققا شالىنعان جانۋارلاردىڭ دەنەسى كومىلگەن 6 شۇڭقىردى ارىلتا تازارتقان. ناتيجەسىندە ولاردىڭ تورتەۋىنىڭ ارقايسىسىنان از دەگەندە 20 جىلقىنىڭ مۇردەسى تابىلعان.
«شۇڭقىرلاردىڭ كولەمى ۇلكەن، قۇرىلىمى كۇردەلى. ورتا قاتاردا ەكى شۇڭقىر بار، وڭ جاقتاعى شۇڭقىرعا جىلقىشىنىڭ دەنەسى جەرلەنگەن، ال سول جاقتاعى ەكى قاباتتى پلاتفورمادان قۇرباندىققا شالىنعان 20 جىلقىنىڭ قاڭقاسى قازىپ الىندى. سونداي-اق تابىلعان التىن، تەمىر، سۇيەك بۇيىمداردىڭ سانى از ەمەس، ءبىزدىڭ ويىمىزشا، بۇل مولا يەسىنىڭ ات ۇستىندە وتكەن ءومىرى مەن تىرىدەگى ءسان-سالتاناتىنىڭ ايعاعى بولۋ كەرەك. شىعىس قاتارداعى ەكى شۇڭقىردان سايكەسىنشە 21 جانە 24 جىلقىنىڭ مۇردەسى انىقتالدى، بىراق ات ابزەلدەرى وتە از، بۇلار مولا يەسىنە اس بولسىن دەپ شالىنعان قۇرباندىقتار بولۋى ىقتيمال»، - دەيدى ارحەولوگ.
قۇرباندىققا شالىنعان جىلقىنىڭ بارلىعى دەرلىك 10 جاستان اسقان ات-ايعىرلار. جالپى، قۇرباندىققا شالىنعان مالدىڭ ءتۇرى مەن سانى بەلگىلى ءبىر تارتىپكە ساي ەكەنى بايقالادى. اقىرەتتىك بۇيىمداردىڭ دەنى ات ابزەلدەرى. سونىمەن قاتار، كەي شۇڭقىرعا ادام مەن جىلقى نەمەسە تۇيە ارالاس كومىلگەن. ولار مولا يەسىنىڭ قىزمەتىندە بولعان باقتاشى قۇلدار بولۋى مۇمكىن.
اتالعان قورىمعا قازبا جۇمىستارى 2022 جىلى باستالدى. ءۇش جىل بويى ۇزىلمەگەن ىرگەلى زەرتتەۋدىڭ ناتيجەسىندە ارحەولوگتار ەسكى قورىمنىڭ نەگىزگى مولا مەن قوسىمشا شۇڭقىرلاردان، ۋاقىتشا باسپانا مەن تاس وڭدەيتىن شەبەرحانانىڭ ورنىنان قۇرالعانىن انىقتادى.
ماماندار بۇل جاڭالىق شىعىس تيان-شان وڭىرىندەگى ەجەلگى كوشپەندىلەردىڭ وزگەشە جەرلەۋ ءراسىمىن زەرتتەپ بىلۋدە ماڭىزدى مانگە يە ەكەنىن ايتادى.
