ىشكى ىستەر مينيسترلىگى شەرزات پولاتتىڭ اكەسى قارجاۋباي نۇرىموۆقا قاتىستى قوزعالعان قىلمىستىق ءىستىڭ ءمان-جايىن مالىمدەدى، دەپ حابارلايدى "ادىرنا" ۇلتتىق پورتالى Informburo.kz پورتالىنا سىلتەمە جاساپ.
مينيسترلىكتىڭ مالىمەتىنشە، قارجاۋباي نۇرىموۆ قوعامدىق ورىندا قۇقىققا قايشى ارەكەتتەر جاساعانى ءۇشىن ۇستالعان. قازىرگى ۋاقىتتا پوليتسيا قىزمەتكەرلەرىنە زورلىق-زومبىلىق جاساۋ قاۋپى بويىنشا قىلمىستىق ءىس قوزعالعان. ءىس ودان ءارى تەرگەۋ ءۇشىن الماتى وبلىسى بويىنشا سىبايلاس جەمقورلىققا قارسى ءىس-قيمىل اگەنتتىگىنە جىبەرىلدى.
بۇعان دەيىن وبلىستىق پوليتسيا دەپارتامەنتى نۇرىموۆقا قاتىستى بوتەننىڭ مۇلكىنە قاساقانا زاقىم كەلتىرۋ فاكتىسى بويىنشا ءىس قوزعالعانىن مالىمدەگەن بولاتىن. 10 جەلتوقساندا ەڭبەكشىقازاق اۋدانىنىڭ ازات اۋىلىندا بولعان وقيعا بارىسىندا ءبىر ازاماتقا ماتەريالدىق شىعىن كەلگەنى انىقتالدى. بۇل ارەكەت اكىمشىلىك جاۋاپكەرشىلىك شەگىنەن اسىپ، قىلمىستىق ءىس قوزعاۋعا نەگىز بولدى.
ەسكە سالا كەتەيىك، تالعاردا ورىن العان جاپپاي توبەلەس سالدارىنان 16 جاستاعى شەرزات پولات قازا تاپقان ەدى. وقيعادان كەيىن شەرزاتتىڭ وتباسى اۋىر قايعىلى جاعدايلارعا تاپ بولدى: ولاردىڭ ءۇيى بەلگىسىز بىرەۋلەر تاراپىنان ورتەلىپ، كەيىن شەرزاتتىڭ اعاسى نۇرعانات عايىپباەۆتىڭ دەنەسى تابىلعان.
قارجاۋباي نۇرىموۆ 9 جەلتوقساندا جۋرناليستەردى شاقىرىپ، نارازىلىعىن ءبىلدىرىپ، قولىنا پىشاق الىپ، وزىنە قول جۇمسايتىنىن ايتقان سوڭ ۇستالدى. ول “بۇزاقىلىق” بابى بويىنشا 15 تاۋلىككە قاماۋعا الىنعان بولاتىن.
سوتقا دەيىنگى تەرگەۋ جالعاسىپ جاتىر، ال ءىستىڭ ءمان-جايى قوسىمشا تەرگەۋ ناتيجەسىندە ناقتىلاناتىن بولادى.
