ۇكىمەت «قازاقستان رەسپۋبليكاسى پرەزيدەنتىنىڭ جانىنداعى قازاقستان رەسپۋبليكاسى ۇلتتىق عىلىم اكادەمياسىنىڭ كەيبىر ماسەلەلەرى تۋرالى» 2024 جىلعى 30 جەلتوقسانداعى قاۋلىنى قابىلدادى، دەپ حابارلايدى “ادىرنا” ۇلتتىق پورتالى.
قۇجاتتا: «قر پرەزيدەنتىنىڭ جانىنداعى «قازاقستان رەسپۋبليكاسىنىڭ ۇلتتىق عىلىم اكادەمياسى» كوممەرتسيالىق ەمەس اكتسيونەرلىك قوعامى قر پرەزيدەنتىنىڭ جانىنداعى «قازاقستان رەسپۋبليكاسىنىڭ ۇلتتىق عىلىم اكادەمياسى» جوعارى عىلىمي ۇيىمىنا قايتا قۇرىلسىن».
قر پرەزيدەنتىنىڭ جانىنداعى قر ۇلتتىق عىلىم اكادەميانىڭ نەگىزگى قىزمەت تۇرلەرى:
الەۋمەتتىك-ەكونوميكالىق دامۋ باسىمدىقتارىنا سايكەس عىلىمي جانە (نەمەسە) عىلىمي-تەحنيكالىق قىزمەتتىڭ باسىم باعىتتارىن، سونداي-اق قازاقستان رەسپۋبليكاسىنداعى ستراتەگيالىق، ىرگەلى جانە قولدانبالى عىلىمي زەرتتەۋلەردىڭ باسىم باعىتتارىن ايقىنداۋ جونىندەگى ۇسىنىمداردى تۇجىرىمداۋ;
قازاقستان رەسپۋبليكاسىنىڭ پرەزيدەنتى جانىنداعى عىلىم جانە تەحنولوگيالار جونىندەگى ۇلتتىق كەڭەسكە ۋاكىلەتتى ورگان ۇسىنعان عىلىم مەن تەحنولوگيالاردى دامىتۋدىڭ ستراتەگيالىق باسىم باعىتتارىنا تالداۋ جۇرگىزۋ;
باعدارلامالىق-نىسانالى قارجىلاندىرۋ ءۇشىن جوعارى عىلىمي-تەحنيكالىق كوميسسيانىڭ قاراۋىنا ۇسىنىلعان عىلىمي-تەحنيكالىق تاپسىرمالارعا ساراپتاما جۇرگىزۋ;
عىلىمدى دامىتۋ بويىنشا فورسايتتىق (بولجامدى) زەرتتەۋلەر دايىنداۋدى جانە جۇرگىزۋدى جۇزەگە اسىرۋ;
عىلىم سالاسىندا اتاۋلى سىيلىقتار مەن ستيپەنديالار الۋعا كونكۋرستار وتكىزۋ;
عىلىم مەن تەحنيكانىڭ ءتۇرلى سالالارىندا عىلىمي زەرتتەۋلەر جۇرگىزۋ;
عىلىمي جۋرنالداردى شىعارۋ;
حالىقارالىق عىلىمي جانە عىلىمي-تەحنيكالىق ىنتىماقتاستىقتى دامىتۋعا قاتىسۋ;
عىلىمدى ناسيحاتتاۋعا قاتىسۋ.
قاۋلى 2024 جىلعى 30 جەلتوقساننان باستاپ قولدانىسقا ەنگىزىلدى.
