تۇركيا سيرياداعى كۇرد سودىرلارىنا قارسى اسكەري وپەراتسياعا دايىندالۋدا. بۇل تۋرالى تۇركيانىڭ سىرتقى ىستەر ءمينيسترى حاكان فيدان مالىمدەدى، دەپ حابارلايدى "ادىرنا" ۇلتتىق پورتالى Hürriyet باسىلىمىنا سىلتەمە جاساپ.
تۇركيانىڭ سىرتقى ىستەر ءمينيسترىنىڭ ايتۋىنشا، سيريا ۇكىمەتىمەن بىرلەسە وتىرىپ، كۇردىستان جۇمىسشى پارتياسىنىڭ (كجپ) سودىرلارى تالاپتاردى ورىنداماعان جاعدايدا اۋقىمدى اسكەري وپەراتسيا ءسوزسىز جۇزەگە اسادى.
تالاپتاردىڭ قاتارىنا قارۋ – جاراقتى تاپسىرۋ، سيريانى باسقارۋعا ارالاسۋدى توقتاتۋ، سونداي-اق، ايماقتاعى جاعدايدى تۇراقسىزداندىرۋعا ىقپال ەتۋى مۇمكىن باتىس ەلدەرىنىڭ قولداۋىنان باس تارتۋ جاتادى.
ءمينيستردىڭ پىكىرىنشە، باتىس ەلدەرى ايماقتاعى جاعدايدى تۇراقسىزداندىرۋعا ىقپال ەتىپ وتىر.
تۇرىك تاراپى وپەراتسيانىڭ باستى ماقساتى – سيريانىڭ شەكارالاس ايماقتارىندا بەلسەندى ارەكەت ەتەتىن كجپ تاراپىنان تونەتىن قاۋىپ-قاتەردى جويۋ ەكەنىن اتاپ ءوتتى. سونىمەن قاتار، انكارا بۇعان دەيىن ايماقتى تۇراقتاندىرۋعا باعىتتالعان ارەكەتتەر كجپ-نىڭ ءارى قاراي ءومىر سۇرۋىنە جاعداي جاساماۋى كەرەك دەپ سانايدى.
حاكان فيدان سونداي-اق سودىرلارعا ۋلتيماتۋم بەرىلگەنىن حابارلادى. ۋلتيماتۋم شارتتارىنا سايكەس، ولار سيريا اۋماعىنان كەتۋى ءتيىس. ال قالعاندارىنا قارۋىن تاستاپ، جاڭا سيريالىق مەملەكەتتىك قۇرىلىممەن ىنتىماقتاسۋ ۇسىنىلادى.
انكارا مەن داماسكانىڭ بىرلەسكەن وپەراتسياسىن باستاۋعا قانداي باتىس ەلدەرىنىڭ ارەكەتتەرى «سەبەپ بولۋى» مۇمكىن ەكەنى ازىرگە بەلگىسىز. الايدا ساراپشىلار تۇركيا مەن سيريانىڭ وسى ماسەلەدەگى ىنتىماقتاستىعى تاياۋ شىعىستاعى گەوساياسي جاعدايدى وزگەرتەتىن ماڭىزدى فاكتورعا اينالۋى مۇمكىن ەكەنىن ايتۋدا.
