قىرعىزستاندا اۆتوكولىككە سالىناتىن سالىق تولىعىمەن جويىلدى. بۇل تۋرالى بۇگىن سادىر جاپاروۆ ءوزىنىڭ Facebook پاراقشاسىندا جاريالادى، دەپ حابارلايدى "ادىرنا" ۇلتتىق پورتالى.
جارلىققا سايكەس، پرەزيدەنت اۆتوكولىكتەرگە سالىناتىن سالىقتى تولىعىمەن الىپ تاستاۋدى تاپسىرعان.
"بۇل شەشىم "جول قورى تۋرالى" زاڭعا ەنگىزىلگەن وزگەرىستەرگە بايلانىستى قابىلداندى. زاڭ بويىنشا ءار ليتر جانارمايدان ءبىر سوم مولشەرىندە الىم الىنادى. كولىكتەرگە سالىناتىن سالىق الىنىپ تاستالدى، ونىڭ ورنىنا 2025 جىلدىڭ 1 قاڭتارىنان باستاپ ءار ليتر بەنزين نەمەسە ديزەل وتىنى ءۇشىن ءبىر سوم (6,11 تەڭگە) الىنادى" - دەدى سادىر جاپاروۆ.
سونداي-اق، پرەزيدەنت 2025 جىلدىڭ 1 قاڭتارىنا دەيىن اۆتوكولىك سالىعىن تولەمەگەن ازاماتتاردى سالىقتان بوساتۋدى تاپسىردى.
"سالىق تولەمەگەن ازاماتتاردىڭ سانى از ەمەس ەكەنى انىقتالدى. مەملەكەت ءۇشىن ۇلكەن قيىندىقتارعا قاراماستان، ءبىز وسىنداي شەشىم قابىلدادىق" - دەدى قىرعىزستان پرەزيدەنتى.
جاپاروۆ ءسوزىنىڭ سوڭىندا مەملەكەتتىڭ كۇشى مەن دامۋى جينالاتىن سالىقتارعا بايلانىستى ەكەنىن ەسكە سالدى.
"جالاقىنى، زەينەتاقىنى، جاردەماقىنى ارتتىرۋ، الەۋمەتتىك نىساندار سالۋ، جولداردى اسفالتتاۋ جانە باسقا دا جۇمىستار جينالعان سالىقتارعا تاۋەلدى. ءبىز سالىق تولەمەۋ جازاسىز قالاتىن نارسە دەگەن تۇسىنىكتەن ارىلۋىمىز كەرەك. ءبىز ۇلگى تۇتاتىن دامىعان ەلدەردە سالىق تولەۋ مىندەت سانالادى. ولاردى تولەمەۋ نەمەسە سالىقتان جالتارۋ ءۇشىن وتە قاتال جازا قاراستىرىلعان. سوندىقتان بىزدە دە سالىقتار مىندەتتى بولۋى ءتيىس. وسى ساتتەن باستاپ سالىقتى ۋاقىتىلى تولەڭىزدەر"- دەپ جازدى ول.
