امەريكا قۇراما شتاتتارىندا ەلدىڭ 39-شى پرەزيدەنتى دجيممي كارتەرمەن مەملەكەتتىك قوشتاسۋ راسىمىنە ارنالعان ازا تۇتۋ شارالارى باستالدى، دەپ حابارلايدى "ادىرنا" ۇلتتىق پورتالى BBC-گە سىلتەمە جاساپ.
كارتەر وتكەن ايدا 100 جاسىندا ءوزىنىڭ تۋعان جەرى دجوردجيا شتاتىنداعى پلەينس قالاسىندا دۇنيەدەن وزدى.
سەنبى كۇنى كارتەردىڭ دەنەسى وتباسىلىق قىسقا راسىمنەن كەيىن دجوردجيا شتاتىنىڭ استاناسى اتلانتاعا جەتكىزىلدى. وندا دجوردجيا تۇرعىندارى ءۇشىن ەكس-پرەزيدەنتپەن قوشتاسۋ ءراسىمى ءوتتى.
دجيممي كارتەرمەن قوشتاسقىسى كەلەتىن بارلىق ادامدار 7 قاڭتار، سەيسەنبى تاڭىنا دەيىن بۇل مۇمكىندىكتى پايدالانا الادى. سول كۇنى قارالى شەرۋ كارتەردىڭ دەنەسى ۇشاقپەن جەتكىزىلەتىن اقش استاناسى ۆاشينگتونعا باعىت الادى. تابىت كاپيتولي عيماراتىندا قويىلادى.
ۆاشينگتوندا امەريكالىقتار 39-شى پرەزيدەنتپەن قوشتاسۋدى 8 قاڭتار، سارسەنبى تاڭىنان باستاپ 9 قاڭتار، بەيسەنبى تاڭىنا دەيىن جالعاستىرا الادى.
پرەزيدەنت دجو بايدەن 9 قاڭتاردى دەمالىس كۇنى دەپ جاريالادى.
بارلىق راسىمدەر اياقتالعان سوڭ، كارتەردىڭ دەنەسى تۋعان جەرىنە قايتارىلىپ، بىلتىر 96 جاسىندا قايتىس بولعان جۇبايى روزالين كارتەردىڭ جانىنا جەرلەنەدى.
مەملەكەتتىك جەرلەۋ ءراسىمى – بۇل ۇلتتىق دەڭگەيدەگى شارا، ەرەكشە ازاماتتارعا، ەلدىڭ قوعامدىق ومىرىنە ايرىقشا ۇلەس قوسقان تۇلعالارعا ارنالعان قۇرمەت.
اقش-تا بۇل راسىمدەرگە پرەزيدەنتتەر كوبىنەسە، ەگەر ولاردىڭ وتباسى كەلىسىم بەرسە، لايىق دەپ تانىلادى. جەرلەۋ ءراسىمى ءبىر اپتادان 10 كۇنگە دەيىن جالعاسادى. ويتكەنى مارقۇممەن الدىمەن تۋعان جەرىندە، سودان كەيىن ەل استاناسىندا قوشتاسادى.
سوڭعى مەملەكەتتىك جەرلەۋ 2018 جىلى قايتىس بولعان دجوردج بۋشقا ارنالعان.
كارتەردىڭ جانازاسى 9 قاڭتاردا ۆاشينگتون ۇلتتىق سوبورىندا وتەدى. بۇل راسىمگە بىرنەشە ەكس-پرەزيدەنتتەر قاتىسادى دەپ كۇتىلۋدە.
پرەزيدەنت دجو بايدەن كارتەردىڭ جەرلەۋىندە ءسوز سويلەۋگە ۋادە بەرگەن.
بۇرىنعى پرەزيدەنتتەر مەن ولاردىڭ جۇبايلارى ادەتتە ءوز الدىنداعى پرەزيدەنتتەردىڭ جەرلەۋىنە قاتىسادى. سوندىقتان ءبىرىنشى حانىم دجيلل بايدەن جانە ەكس-پرەزيدەنت باراك وباما، حيللاري جانە بيلل كلينتوندار قاتىسادى دەپ كۇتىلۋدە.
سايلانعان پرەزيدەنت دونالد ترامپ تا راسىمگە قاتىساتىنىن راستادى. بىلتىر ول روزالين كارتەردىڭ جەرلەۋىنە قاتىسپاسا دا، ونىڭ جۇبايى مەلانيا جانە باسقا ەكس-ءبىرىنشى حانىمدار سول راسىمدە بولعان ەدى.
ترامپ ۆاشينگتوندا وتكەن رەسپۋبليكاشىل دجوردج بۋشتىڭ جەرلەۋ راسىمىندە دە بولدى. ول جەردە بەس پرەزيدەنت، ونىڭ ىشىندە دجيممي كارتەر دە بولعان.
