29-30 جەلتوقسان كۇندەرى تانىمال قازاقستاندىق ءانشى ديماش قۇدايبەرگەن قىتايدىڭ BRTV تەلەارناسى ۇيىمداستىرعان «最美中轴线 Singing for the Central Axis of Beijing» جوباسى اياسىندا بەيجىڭدەگى جەر حرامىنا بارىپ قايتتى، دەپ حابارلايدى “ادىرنا” ۇلتتىق پورتالى Dimashnews.com سايتىنا سىلتەمە جاساپ.
1267 جىلى يۋان اۋلەتى كەزىندە قالىپتاسقان بۇل باعىت جەر حرامى مەن اسپان حرامى سياقتى ماڭىزدى تاريحي نىسانداردى قامتيدى. جەر حرامى مەن اسپان حرامى العاشىندا ءبىر كەشەن بولعانىمەن، 1530 جىلى بولەك نىساندار رەتىندە قالىپتاسقان.
جوبا بارىسىندا ديماش قۇدايبەرگەن قىتايلىق ءانشى گۋن ليننامەن بىرگە جەر حرامىنىڭ كورىكتى ورىندارىن ارالاپ، جەرگىلىكتى تاعامداردان ءدام تاتىپ، ءبىر-بىرىنە سىيلىقتار تابىستادى. قازاقتىڭ ۇلتتىق دومبىراسىنىڭ تاريحىن بايانداعان ديماش ونى گۋن لينناعا سىيعا تارتتى.
ديماش ءداستۇرلى تۇردە دومبىرادا ويناپ، گۋن ليننا قىتاي حالقىنىڭ تانىمال «Jasmin» ءانىن ورىندادى. سونداي-اق، قازاقتىڭ حالىق ءانى «قاراتورعايدى» تۋعان تىلىندە شىرقاپ، تىڭدارمانداردى ءتانتى ەتتى.
ءىس-شارا سوڭىندا قاتىسۋشىلار 1688 جىلى سالىنعان چجەني حرامىنىڭ تەاترىنا باردى. بۇل تەاتر بەيجىڭ وپەراسىن قويۋ ءداستۇرىن ساقتاپ قالعان مادەني مۇرا نىسانى بولىپ سانالادى.
ايتا كەتسەك، بۇعان دەيىن ديماش قۇدايبەرگەن قىتايدىڭ سىچۋان پروۆينتسياسىنىڭ استاناسى چەندۋ قالاسىندا وتكەن جاڭاجىلدىق مەرەكەگە قاتىسقان بولاتىن.
