29-30 jeltoqsan kúnderi tanymal qazaqstandyq ánshi Dımash Qudaıbergen Qytaıdyń BRTV telearnasy uıymdastyrǵan «最美中轴线 Singing for the Central Axis of Beijing» jobasy aıasynda Beıjińdegi Jer hramyna baryp qaıtty, dep habarlaıdy “Adyrna” ulttyq portaly Dimashnews.com saıtyna silteme jasap.
1267 jyly Iýan áýleti kezinde qalyptasqan bul baǵyt Jer hramy men Aspan hramy sııaqty mańyzdy tarıhı nysandardy qamtıdy. Jer hramy men Aspan hramy alǵashynda bir keshen bolǵanymen, 1530 jyly bólek nysandar retinde qalyptasqan.
Joba barysynda Dımash Qudaıbergen qytaılyq ánshi Gýn Lınnamen birge Jer hramynyń kórikti oryndaryn aralap, jergilikti taǵamdardan dám tatyp, bir-birine syılyqtar tabystady. Qazaqtyń ulttyq dombyrasynyń tarıhyn baıandaǵan Dımash ony Gýn Lınnaǵa syıǵa tartty.
Dımash dástúrli túrde dombyrada oınap, Gýn Lınna qytaı halqynyń tanymal «Jasmin» ánin oryndady. Sondaı-aq, qazaqtyń halyq áni «Qaratorǵaıdy» týǵan tilinde shyrqap, tyńdarmandardy tánti etti.
Is-shara sońynda qatysýshylar 1688 jyly salynǵan Chjenı hramynyń teatryna bardy. Bul teatr Beıjiń operasyn qoıý dástúrin saqtap qalǵan mádenı mura nysany bolyp sanalady.
Aıta ketsek, buǵan deıin Dımash Qudaıbergen Qytaıdyń Sychýan provınııasynyń astanasy Chendý qalasynda ótken jańajyldyq merekege qatysqan bolatyn.
