2024 جىلعى 25 جەلتوقساندا قازاقستاننىڭ اقتاۋ قالاسى ماڭىندا اپاتقا ۇشىراعان AZAL ۇشاعىنىڭ قيراعان بولىكتەرى مەن كۋاگەرلەردىڭ مالىمەتتەرى سىرتقى ىقپال بولعانىن مەڭزەيدى. بۇل تۋرالى ازەربايجاننىڭ تسيفرلىق دامۋ جانە كولىك ءمينيسترى راشاد نابيەۆ مالىمدەدى، دەپ حابارلايدى "ادىرنا" ۇلتتىق پورتالى Report-قا سىلتەپ.
ءمينيستردىڭ ايتۋىنشا، ازەربايجان پرەزيدەنتى يلحام اليەۆتىڭ تاپسىرماسىمەن اپاتتان كەيىن ارنايى كوميسسيا قۇرىلىپ، ونىڭ مۇشەلەرى اقتاۋ قالاسىنا بارىپ، اپاتتىڭ سەبەپتەرىن جانە زارداپ شەككەندەردىڭ جاعدايىن مۇقيات زەرتتەگەن. كوميسسيا وقيعا ورنىن قاراپ، ازەربايجان مەن باسقا ەلدەردىڭ جاراقات العان ازاماتتارىمەن كەزدەستى.
راشاد نابيەۆتىڭ ايتۋىنشا، جولاۋشىلار مەن ءتىرى قالعان بورتسەرىكتەر ۇشاق گروزنىي قالاسىنىڭ ۇستىندە بولعان كەزدە جارىلىس دىبىسىن ەستىگەنىن حابارلاعان.
"بورتسەرىكتەردىڭ ءبىرى قولىنان جاراقات الدى. الەۋمەتتىك جەلى مەن باق-تا جاريالانعان سۋرەتتەردەن ءبىر ايەلدىڭ قولى مەن اياعىنان جاراقات العانىن كورۋگە بولادى. ۇشاقتىڭ قاناتىنان تەسىك انىقتالدى، ال فيۋزەلياجدان جارىلعىش زاتتىڭ سىنىقتارى قالدىرعان ىزدەر تابىلدى. رەسەي ازاماتتارى دا گروزنىيدىڭ ۇستىندە ءۇش جارىلىس بولعانىن، جارىلىستار سىرتتان شىققانىن جانە سول كەزدە ءبىر زاتتىڭ ۇشاققا سوعىلعانىن ايتتى", – دەدى مينيستر.
مينيستر باسپاسوزدە اپاتتىڭ سەبەبى رەتىندە قۇستارمەن سوقتىعىسۋ بولجامى ايتىلعانىن، الايدا الدىن الا ساراپتاما ناتيجەلەرى سىرتقى ىقپالدىڭ بولعانىن كورسەتەتىنىن اتاپ ءوتتى.
"ۇشاق سىنىقتارىنىڭ جەردەگى كورىنىسى مەن كۋاگەرلەردىڭ ايتقاندارى بۇل بولجامدى راستايدى. قولدانىلعان قارۋدىڭ ءتۇرىن تەرگەۋ انىقتايدى", – دەدى ول.
مينيستر ۇشاق باعىتىنىڭ ماحاچقالا ارقىلى اقتاۋعا وزگەرگەنىن دە اتاپ ءوتتى. سونىمەن قاتار، پيلوتتىڭ اپاتتى قونۋ تۋرالى شەشىم قابىلداۋ سەبەبى مەن ۇشاقتاعى GPS قۇرىلعىسىنىڭ ءوشىرىلۋ جاعدايى انىقتالدى.
راشاد نابيەۆ ەكيپاجدىڭ باتىرلىعىن جوعارى باعالادى.
"ەكيپاجدىڭ كاسىبي جانە ەرلىكپەن ارەكەت ەتۋى ارقاسىندا كوپتەگەن جولاۋشىنىڭ ءومىرى ساقتالدى. ازەربايجان حالىقارالىق ساراپشىلاردى تەرگەۋ پروتسەسىنە تارتىپ، ونىمەن تىعىز بايلانىس ورناتتى", – دەدى ول.
ءمينيستردىڭ ايتۋىنشا، Embraer كومپانياسىنىڭ ەكى مامانى وقيعا ورنىندا جۇمىس ىستەپ جاتىر، ال ەرتەڭ تەرگەۋگە برازيليادان كەلگەن ساراپشىلار قوسىلادى.
قازاقستاندىق شەنەۋنىكتەر روستوۆتاعى ديسپەتچەر ۇسىنعان وتتەگى باللونىنىڭ جارىلۋى تۋرالى نۇسقانى العا تارتتى.
"بۇل اقپاراتتى تەكسەرۋ قاجەت دەپ سانايمىز، ويتكەنى ول مۇددەلى تاراپتان الىنعان. سونىمەن بىرگە، سىرتقى جارىلىس دىبىستارى بۇل نۇسقانى جوققا شىعارادى", – دەدى مينيستر.
25 جەلتوقساندا باكۋ–گروزنىي باعىتىمەن ۇشقان Embraer 190 ۇشاعى اقتاۋ قالاسى ماڭىندا اپاتقا ۇشىرادى. ۇشاقتا 62 جولاۋشى بولعان، ونىڭ ىشىندە 37 ازەربايجان، 16 رەسەي، 6 قازاقستان، 3 قىرعىزستان ازاماتى جانە 5 ەكيپاج مۇشەسى بولعان. اپات سالدارىنان 38 ادام قازا تاپتى، 29-ى ءتىرى قالدى.
