قازاقستان پارلامەنت سەناتىنىڭ توراعاسى ماۋلەن اشىمباەۆ رەكوردتىق كورسەتكىشكە قول جەتكىزگەن «گاۋھارتاس» قويىلىمىن تاماشالادى، دەپ حابارلايدى “ادىرنا” ۇلتتىق پورتالى.
استانا قالاسى اكىمدىگىنىڭ مۋزىكالىق جاس كورەرمەن تەاترىنىڭ شىعارماشىلىق تولقۇجاتى ىسپەتتەس د.يسابەكوۆتىڭ «گاۋھارتاس» مۋزىكالىق دراماسىن ساحنالاعان ءبىر جىل ون ايدىڭ ىشىندە، حالىقتىڭ كوزايىمىنا اينالىپ، كورەرمەن نازارىنا 250 مارتە ۇسىنىلىپ، قازاقستاننىڭ تەاتر كەڭىستىگىندە رەكوردتىق كورسەتكىشكە قول جەتكىزدى.
250-ءشى رەت كورسەتىلگەن سپەكتاكلدى تاماشالاعان كورەرمەن قاتارىندا قازاقستان پارلامەنت سەناتىنىڭ توراعاسى ماۋلەن ساعاتحانۇلى اشىمباەۆ بولدى.
ماۋلەن ساعاتحانۇلى قويىلىم سوڭىندا ساحناعا كوتەرىلىپ، د.يسابەكوۆتىڭ سۋرەتكەرلىك الەمى، سپەكتاكلدىڭ يدەياسى مەن كوركەمدىك دەڭگەيى، اكتەرلەرىمىز سومداعان بەينەلەر تۋرالى جۇرەكجاردى پىكىرىن ءبىلدىرىپ، كەيىن الەۋمەتتىك پاراقشاسىنا ءوز ويىمەن بىلاي دەپ ءبولىستى:
«كەشە ءبىر توپ ارىپتەسىممەن بىرگە استانا قالاسى اكىمدىگىنىڭ مۋزىكالىق جاس كورەرمەندەر تەاترىنا بارىپ، «گاۋھارتاس» قويىلىمىن تاماشالاپ قايتتىق. پرەمەراسىنان باستاپ ءار سەانسى انشلاگپەن ءوتىپ كەلە جاتقان سپەكتاكل وسىمەن 250-رەت وينالىپ وتىر ەكەن.
بەلگىلى جازۋشى دۋلات يسابەكوۆتىڭ شىعارماسىنىڭ جەلىسىمەن ساحنالانعان بۇل قويىلىم قوعامدا ۇلكەن قىزىعۋشىلىق تۋدىرىپ، بىردەن قالىڭ كورەرمەننىڭ قولداۋىنا يە بولدى. مۇنىڭ باستى سەبەبى تۋىندىنىڭ ارقالاعان جۇگى مەن اتقاراتىن ميسسياسىندا جاتىر دەسەك، قاتەلەسپەيمىز.
شىن مانىندە، جازىلعانىنا 60 جىلعا جۋىق ۋاقىت وتسە دە پوۆەستكە ارقاۋ بولعان ايەل تاعدىرى ءالى كۇنگە دەيىن وزەكتى ماسەلە كۇيىندە قالىپ وتىر. ءتىپتى، سوڭعى جىلداردا ەلىمىزدە بولعان وقيعانى ەسكەرسەك، بۇل تاقىرىپتىڭ ماڭىزى بۇرىنعىدان دا ارتا تۇسكەنىن بايقايمىز.
تۋىندى وتباسىن ساقتاۋ، ايەلدى قۇرمەتتەۋ، باردى باعالاۋ سياقتى ومىرلىك قاعيدالاردى دارىپتەۋمەن قاتار، سەنىم، سىيلاستىق، ماحاببات دەيتىن نازىك سەزىمدەرگە سىزات تۇسىرمەۋگە ۇندەيدى. قوعامدا وسىنداي دۇرىس قۇندىلىقتاردى قالىپتاستىرۋ ءۇشىن قويىلىمدى كەڭىنەن ناسيحاتتاعان ابزال.
وسى ورايدا سپەكتاكلدىڭ كورەرمەندەرى نەگىزىنەن جاستار ەكەنى قۋانتادى. راسىمەن، قازىرگىدەي ينتەرنەت داۋىرىندە جاس بۋىننىڭ تەاترعا كەلىپ، تاعىلىمى مول دۇنيەگە قىزىعۋى ايرىقشا مانگە يە. بۇل، ءبىر جاعىنان، جاس كورەرمەندەردى جالىقتىرىپ الماۋدىڭ ۇتىمدى ءتاسىلىن تاپقان ۇجىمنىڭ شەبەرلىگى مەن اسىلحان تولەپوۆ، ورازالى يگىلىك، ينابات ريزابەكوۆا، ەرنار مۇحامبەت سياقتى اكتەرلەردىڭ تالانتىنىڭ ناتيجەسى ەكەنى ءسوزسىز.
جالپى، اتالعان تەاتردىڭ اشىلعانىنا كوپ ۋاقىت وتكەن جوق. سوعان قاراماستان رەپەرتۋارىندا ماڭىزدى ماسەلەلەردى كوتەرەتىن سالماقتى قويىلىمدار از ەمەس. سونىڭ بارىندە ءداستۇرلى ساحنا مەن كرەاتيۆ ادەمى ۇيلەسىم تاپقانىن اتاپ وتكەن ءجون.
تەك تەاتردا ەمەس، جالپى، ونەردە، مادەنيەتتە وسىنداي ەكسپەريمەنتتەر جاساۋدىڭ جانە كلاسسيكالىق ۇعىمعا جاڭاشا كوزقاراسپەن قاراۋدىڭ بەرەرى كوپ. بۇل قادام الەمدىك دەڭگەيگە كوتەرىلۋگە جول اشادى.
وسى باعىتتا كوپكە ۇلگى كورسەتىپ وتىرعان اسحات ماەميروۆ باستاعان ونەر ۇجىمىنا الداعى ۋاقىتتا شىعارماشىلىق تابىس پەن جاڭا جەتىستىكتەر تىلەيمىز. تەاتردىڭ ءورىسى كەڭەيىپ، كورەرمەندەرىڭىز كوبەيە بەرسىن!» - دەپ، پارلامەنت سەناتىنىڭ توراعاسى، ماۋلەن ساعاتحانۇلى جۇرەكجاردى پىكىرىن ءبىلدىردى.
سپەكتاكلدىڭ ءار قويىلىمى انشلاگپەن ءوتىپ، بۇگىنگى تاڭعا دەيىن 100 مىڭنان استام كورەرمەن تاماشالادى.
قويىلىم ەلوردامىزدان بولەك الماتى، اقتاۋ، اتىراۋ، ورال، تالدىقورعان، تاراز، شىمكەنت، تۇركىستان، وسكەمەن، سەمەي جانە جاڭاوزەن قالالارىندا، سونىمەن بىرگە باياناۋىل، سىرىم اۋداندارىندا كورسەتىلگەن ەدى.
سونىمەن بىرگە استانا قالاسىنىڭ ماسكەۋدەگى مادەنيەت كۇندەرى اياسىندا ماسكەۋ مەملەكەتتىك «دراما ونەرىنىڭ مەكتەبى» تەاترىندا كورسەتىلدى.
