Qazaqstan Parlament Senatynyń tóraǵasy Máýlen Áshimbaev rekordtyq kórsetkishke qol jetkizgen «Gaýhartas» qoıylymyn tamashalady, dep habarlaıdy “Adyrna” ulttyq portaly.
Astana qalasy ákimdiginiń Mýzykalyq jas kórermen teatrynyń shyǵarmashylyq tólqujaty ispettes D.Isabekovtiń «Gaýhartas» mýzykalyq dramasyn sahnalaǵan bir jyl on aıdyń ishinde, halyqtyń kózaıymyna aınalyp, kórermen nazaryna 250 márte usynylyp, Qazaqstannyń teatr keńistiginde rekordtyq kórsetkishke qol jetkizdi.
250-shi ret kórsetilgen spektakldi tamashalaǵan kórermen qatarynda Qazaqstan Parlament Senatynyń tóraǵasy Máýlen Saǵathanuly Áshimbaev boldy.
Máýlen Saǵathanuly qoıylym sońynda sahnaǵa kóterilip, D.Isabekovtiń sýretkerlik álemi, spektakldiń ıdeıasy men kórkemdik deńgeıi, akterlerimiz somdaǵan beıneler týraly júrekjardy pikirin bildirip, keıin áleýmettik paraqshasyna óz oıymen bylaı dep bólisti:
«Keshe bir top áriptesimmen birge Astana qalasy ákimdiginiń Mýzykalyq jas kórermender teatryna baryp, «Gaýhartas» qoıylymyn tamashalap qaıttyq. Premerasynan bastap ár seansy anshlagpen ótip kele jatqan spektakl osymen 250-ret oınalyp otyr eken.
Belgili jazýshy Dýlat Isabekovtiń shyǵarmasynyń jelisimen sahnalanǵan bul qoıylym qoǵamda úlken qyzyǵýshylyq týdyryp, birden qalyń kórermenniń qoldaýyna ıe boldy. Munyń basty sebebi týyndynyń arqalaǵan júgi men atqaratyn mıssııasynda jatyr desek, qatelespeımiz.
Shyn máninde, jazylǵanyna 60 jylǵa jýyq ýaqyt ótse de povestke arqaý bolǵan áıel taǵdyry áli kúnge deıin ózekti másele kúıinde qalyp otyr. Tipti, sońǵy jyldarda elimizde bolǵan oqıǵany eskersek, bul taqyryptyń mańyzy burynǵydan da arta túskenin baıqaımyz.
Týyndy otbasyn saqtaý, áıeldi qurmetteý, bardy baǵalaý sııaqty ómirlik qaǵıdalardy dáripteýmen qatar, senim, syılastyq, mahabbat deıtin názik sezimderge syzat túsirmeýge úndeıdi. Qoǵamda osyndaı durys qundylyqtardy qalyptastyrý úshin qoıylymdy keńinen nasıhattaǵan abzal.
Osy oraıda spektakldiń kórermenderi negizinen jastar ekeni qýantady. Rasymen, qazirgideı ınternet dáýirinde jas býynnyń teatrǵa kelip, taǵylymy mol dúnıege qyzyǵýy aıryqsha mánge ıe. Bul, bir jaǵynan, jas kórermenderdi jalyqtyryp almaýdyń utymdy tásilin tapqan ujymnyń sheberligi men Asylhan Tólepov, Orazaly Igilik, Inabat Rızabekova, Ernar Muhambet sııaqty akterlerdiń talantynyń nátıjesi ekeni sózsiz.
Jalpy, atalǵan teatrdyń ashylǵanyna kóp ýaqyt ótken joq. Soǵan qaramastan repertýarynda mańyzdy máselelerdi kóteretin salmaqty qoıylymdar az emes. Sonyń bárinde dástúrli sahna men kreatıv ádemi úılesim tapqanyn atap ótken jón.
Tek teatrda emes, jalpy, ónerde, mádenıette osyndaı eksperımentter jasaýdyń jáne klassıkalyq uǵymǵa jańasha kózqaraspen qaraýdyń bereri kóp. Bul qadam álemdik deńgeıge kóterilýge jol ashady.
Osy baǵytta kópke úlgi kórsetip otyrǵan Ashat Maemırov bastaǵan óner ujymyna aldaǵy ýaqytta shyǵarmashylyq tabys pen jańa jetistikter tileımiz. Teatrdyń órisi keńeıip, kórermenderińiz kóbeıe bersin!» - dep, Parlament Senatynyń tóraǵasy, Máýlen Saǵathanuly júrekjardy pikirin bildirdi.
Spektakldiń ár qoıylymy anshlagpen ótip, búgingi tańǵa deıin 100 myńnan astam kórermen tamashalady.
Qoıylym elordamyzdan bólek Almaty, Aqtaý, Atyraý, Oral, Taldyqorǵan, Taraz, Shymkent, Túrkistan, Óskemen, Semeı jáne Jańaózen qalalarynda, sonymen birge Baıanaýyl, Syrym aýdandarynda kórsetilgen edi.
Sonymen birge Astana qalasynyń Máskeýdegi mádenıet kúnderi aıasynda Máskeý memlekettik «Drama óneriniń mektebi» teatrynda kórsetildi.
