Aqtaý mańynda apatqa ushyraǵan "Baký-Groznyı" baǵytyndaǵy Ázerbaıjan ushaǵynyń ekıpajy týraly qosymsha málimetter belgili boldy, dep habarlaıdy "Adyrna" ulttyq portaly.
Áýe kemesiniń kapıtany Reseı azamaty Igor Kshnıakın bolǵan. Ol 15 myń saǵattan astam ushý tájirıbesi bar bilikti maman. Onyń ishinde 11 200 saǵat kapıtan retinde ushqan. Reseılik aqparat quraldarynyń málimetinshe, Kshnıakın áýedegi jaǵdaıǵa baılanysty Aqtaýdaǵy qosalqy áýejaıǵa qoný týraly sheshim qabyldaǵan.
Ushaqty basqarǵan ushqysh Aleksandr Kalıanınov – Baký eýropalyq lıeıiniń túlegi. Jas maman qyzmet barysynda erekshe jaýapkershilik tanytyp, ondaǵan adamnyń ómirin saqtap qalǵan.
Ázerbaıjandyq BAQ Kalıanınovty lıeıdegi úzdik túlekterdiń biri dep atap ótti. Qaıǵyly oqıǵadan keıin onyń túlep ushqan oqý orny ushqyshtyń otbasy men jaqyndaryna kóńil aıtý hatyn joldady.
“Ushaq daýsyn estigen saıyn Aleksandrdy eske alamyz,” – delingen hatta.
Aqtaý qalasynyń mańynda 11:10-da oryn alǵan qaıǵyly oqıǵada "Baký-Groznyı" baǵytyndaǵy ushaq apatqa ushyrap, birneshe adamnyń ómiri qıyldy. Apatqa ushyraǵan ushaqtyń buǵan deıin Túrkııada keleńsiz oqıǵaǵa tap bolǵany belgili boldy.
Ázerbaıjanda oryn alǵan qaıǵyly jaǵdaıǵa baılanysty búgin aza tutý kúni dep jarııalandy. Qazaqstandyqtar da apat qurbandaryn eske alyp, qaıǵyǵa ortaqtasyp jatyr.
