قاراعاندىدا 24 جانە 28 نومىرلەرىمەن ەكى جاڭا مەكتەپ سالىندى. قازىرگى زامانعى وقۋ ورىندارى "جايلى مەكتەپ" ۇلتتىق جوباسى بويىنشا سالىندى. ولاردا بالالاردى وقىتۋعا بارلىق جاعداي جاسالعان.
نىساندارعا قاراعاندى وبلىسىنىڭ اكىمى ەرماعانبەت بولەكپاەۆ جانە "Samruk-KazynaConstruction" اق باسقارما توراعاسىنىڭ ءبىرىنشى ورىنباسارى عابيت مالعازداروۆ كەلدى.
كوگىلدىر توعاندارداعى، "توميريس" تك اۋدانىنداعى جاڭا مەكتەپ 1200 ورىنعا شاقتالعان. ول سىنىپتارى شامادان تىس تولىپ كەتكەن جاقىن ماڭداعى 77-ءشى مەكتەپتىڭ جۇكتەمەسىن تومەندەيەدى.
وقۋ ورنى زاماناۋي جابدىقتارمەن جانە ىڭعايلى جيھازدارمەن جابدىقتالعان. كىشى جانە جوعارى سىنىپ وقۋشىلارى ءۇشىن بولەك بلوكتار قاراستىرىلعان. ينكليۋزيۆتى ورتا ءۇشىن قاجەت نارسەنىڭ ءبارى قامتاماسىز ەتىلگەن.
عيماراتتىڭ ءبىرىنشى قاباتىندا ەكى سپورت زالى بار. كەڭ اسحانا جابدىقتالعان.
بالالاردى دامىتۋعا ارنالعان كىتاپحانا، وقۋ زالى، كوۆوركينگ ايماعى، زەرتحانالار، شەبەرحانالار جانە ت. ب. بار.
وقىتۋ قازاق تىلىندە جۇرگىزىلەدى.
№ 24 جببم ديرەكتورىنىڭ مىندەتىن اتقارۋشى قانات بەكتەمىروۆ مەكتەپتىڭ اشىلۋىنا 30 سىنىپتى جاساقتاۋ جوسپارلانعانىن ايتتى. بالالاردى وقىتۋ ءۇشىن 60 كابينەت بولىنگەن. قوسىمشا ءبىلىم بەرۋ ءۇشىن تاعى 10 وقۋ بولمەلەرى قاراستىرىلعان.
ەرماعانبەت بولەكپاەۆ وقۋشىلاردىڭ قاۋىپسىزدىگى باستى نازاردا بولۋى كەرەكتىگىن اتاپ ءوتتى. ول جاڭا مەكتەپكە كولىك تۇراعى بار ىڭعايلى كىرەبەرىستى قامتاماسىز ەتۋدى، قورشاۋ جاساۋدى جانە اۋماقتى اباتتاندىرۋدى تاپسىردى.
– مەملەكەت باسشىسىنىڭ تىكەلەي تاپسىرماسى بويىنشا باستاماشىلىق جاسالعان "جايلى مەكتەپتەر" جوباسى اپاتتى مەكتەپتەردى جويۋعا، وقۋشى ورىندارىنىڭ تاپشىلىعىن تومەندەتۋگە جانە جايلى ءبىلىم بەرۋ پروتسەسىن قامتاماسىز ەتۋگە باعىتتالعان. ءبىرىنشى قىركۇيەكتە ءبىز ايماقتاعى العاشقى جايلى مەكتەپتى اشتىق. وبلىس ورتالىعىندا تاعى ەكەۋى ىسكە قوسىلدى. جاڭا نىسانداردىڭ قۇرىلىسى جالعاسۋدا، – دەدى ەرماعانبەت بولەكپاەۆ.
وڭتۇستىك-شىعىستا، "گۇلدەر" شاعىن اۋدانىندا قازاق تىلىندە وقىتاتىن جاڭا جايلى مەكتەپ 300 ورىنعا ەسەپتەلگەن.
اشىلعاننان كەيىن كورشىلەس ورنالاسقان ى. التىنسارين اتىنداعى مەكتەپ-ليتسەيدەگى جۇكتەمە تومەندەيدى.
جوبانى ىسكە اسىرۋدا وتاندىق ەكونوميكانى قولداۋعا جانە جاڭا جۇمىس ورىندارىن قۇرۋعا ىقپال ەتەتىن جەرگىلىكتى تاۋار وندىرۋشىلەرگە باسىمدىق بەرىلەدى. نىسانداردى سالۋ كەزىندە 30 قاراعاندىلىق كاسىپورىننىڭ قۇرىلىس ماتەريالدارى پايدالانىلدى.
مىسالى، كوگىلدىر توعاندارداعى جايلى مەكتەپتىڭ قۇرىلىسى مەن جابدىقتالۋىنا 10 جەرگىلىكتى تاۋار ءوندىرۋشى جۇمىلدىرىلدى. ولار بەتون، ەدەن پليتالارى، دانەكەرلەنگەن تور، ۆيتراجدار، جەلدەتۋ جابدىقتارى، ەسىك بلوكتارى، شامدار سياقتى ونىمدەردى جەتكىزدى.
سونداي-اق، قاراعاندىدا وندىرىلگەن جيھازدار، تەرەزەلەر مەن جىلىتۋ اسپاپتارى پايدالانىلدى.
ەستەرىڭىزگە سالا كەتەيىك، قاراعاندى وبلىسىندا "جايلى مەكتەپتەر" ۇلتتىق جوباسى بويىنشا بالقاش، اباي، پريوزەرسك، بۇقار جىراۋ، شەت، قارقارالى، نۇرا اۋداندارىندا زاماناۋي وقۋ ورىندارى اشىلادى.
