اقتاۋ ماڭىندا باكۋدەن گروزنىيعا ۇشىپ بارا جاتقان "Azerbaijan Airlines" كومپانياسىنا تيەسىلى Embraer ۇشاعى اپاتقا ۇشىراپ، 38 ادام قازا تاپتى. بۇل وقيعاعا قاتىستى رەسەيدىڭ اۋە قورعانىس جۇيەسىنىڭ ىقتيمال ءرولى تۋرالى بولجامدار ايتىلۋدا، دەپ حابارلايدى "ادىرنا" ۇلتتىق پورتالى.
رەسەيلىك تەلەگرام ارنالارىندا تاراعان مالىمەتتەرگە سايكەس، ۇشاقتاعى شۇرىق-تەسىك تەسىكتەر اۋە شابۋىلىنا قارسى قورعانىس جۇيەسىنىڭ جۇمىسىنان پايدا بولۋى مۇمكىن. اتالعان جۇيە شەشەنستان مەن ۆلاديكاۆكازعا ۇشقىشسىز ۇشاقتارمەن جاسالعان شابۋىلدان كەيىن ىسكە قوسىلعان. اسكەري ساراپشى يان ماتۆەەۆتىڭ ايتۋىنشا، ۇشاق اپاتقا ۇشىراعان كەزدە 9 كم بيىكتىكتە ۇشقان، ال مۇنداي قاشىقتىقتا “پانتسير-س1” جۇيەسى ارەكەت ەتە الادى.
اپاتتان امان قالعان جولاۋشى راحيموۆ RT ارناسىنا بەرگەن سۇحباتىندا، ۇشقىشتاردىڭ گروزنىيعا ءۇش رەت قوندىرماق بولعانىن، ءۇشىنشى تالپىنىس كەزىندە ۇشاق سىرتىنان جارىلىستىڭ داۋسى ەستىلگەنىن ايتتى.
قازىر اپاتتىڭ سەبەپتەرى "جول قوزعالىسى نەمەسە اۋە كولىگىن پايدالانۋ قاۋىپسىزدىگى ەرەجەلەرىن بۇزۋ" بابىمەن تەكسەرىلۋدە. ۇشاقتىڭ قارا جاشىگى تابىلىپ، تەرگەۋگە قوسىمشا ايعاق رەتىندە الىندى.
كولىك ءمينيسترى مارات قاراباەۆتىڭ مالىمدەۋىنشە، ۇشاقپەن بايلانىس ساعات 11:28-دە ۇزىلگەن. ال ساعات 11:30-دا ۇشاق اپاتقا ۇشىراعان.
اپاتقا قاتىستى اقتاۋدا وتكەن بريفينگتە كوميسسيا جەتەكشىسى قانات بوزىمباەۆ ناقتى قورىتىندىنىڭ تەك ماماندار زەرتتەۋىنەن كەيىن جاريالاناتىنىن ايتتى.
"قازىر بۇل وقيعانىڭ سەبەبىن انىقتاۋ قيىن. ماماندار تەرگەۋ جۇرگىزىپ جاتىر، سوندىقتان بولجامدار ايتۋعا ەرتە. بارلىعى انىقتالعاننان كەيىن حابارلايمىز،" – دەدى ۆيتسە-پرەمەر.
تۇپقاراعان اۋدانىندا توتەنشە جاعداي جاريالاندى. اپاتقا قاتىستى تەرگەۋ جالعاسىپ جاتىر.
